ڈیرہ اسماعیل خان + ٹانک (توقیر حسین زیدی/جعفر زکوڑی) صوبہ خیبر پختونخوا کے ضلع ٹانک میں دو گروپوں میں فائرنگ کے تبادلے میں کم از کم 15 افراد جاں بحق ہوگئے جبکہ متعدد افراد زخمی ہوگئے ہیں۔
تفصیلات کے مطابق ضلع ٹانک کے گاوں اماخیل میں تھانہ ملازئی کے حدود میں مسلح افراد نے ذاتی عداوت کی بنیاد پر بدنام زمانہ معروف مسلح گینگ انعام گروپ کے دو افراد کو قتل کر دیا جس کے بعد انعام گروپ کے مسلح افراد درہ بین روڈ پر سواریوں سے بھری فلائنگ کوچ پر فائرنگ کردی جس میں مسافروں سمیت بیٹنی قبائل کے 9 افراد جاں بحق ہوگئے ہیں بعد میں انعام گروپ کی جانب سے مزید انتقامی کاروائی کے نتیجہ میں مذکورہ روڈ پر مزید 6 افراد کو فائرنگ کر کے قتل کر دیا۔ اب تک کی اطلاعات کے مطابق 15 افراد جاں بحق ہو گئے جن میں 1 خاتون بھی شامل ہے جبکہ متعدد افراد زخمی ہیں۔
مقامی افراد اور پولیس اہلکاروں نے اکثر لاشوں اور دو زخمیوں کو ڈی ایچ کیو ٹانک پہنچا دیا ہے جبکہ مزید لاشوں کو مختلف ہسپتالوں میں منتقل کیا جارہا ہے اس وقت تمام ہسپتالوں میں ایمرجنسی نافذ کردی گئی ہے ضلع بھر میں پولیس کو ہائی الرٹ کردیا گیا ہے۔ پاک آرمی اور پولیس کے دستے موقع پر پہنچ گئے ہیں۔ مقامی افراد میں شدید خوف و ہراس پایا جاتا ہے۔
