دبئی (نیوز ڈیسک) انٹرنیشنل کرکٹ کونسل (آئی سی سی) نے حکومتی مداخلت اور بورڈ کے آزاد و شفاف انتخابات کرانے میں ناکامی پر زمبابوے کرکٹ کو معطل کردیا جس کا اطلاق فوری طور پر ہوگا۔
Zimbabwe Cricket have been suspended with immediate effect.https://t.co/lfOC8J5LRm
— ICC (@ICC) July 18, 2019
آئی سی سی کی جانب سے جاری بیان کے مطابق لندن میں انٹرنیشنل کرکٹ کونسل کے سالانہ اجلاس میں آئی سی سی بورڈ نے متفقہ طور پر یہ فیصلہ کیا کہ کونسل کا مستقل رکن ملک زمبابوبے، کرکٹ کے معاملات میں حکومتی عدم مداخلت اور بورڈ کے شفاف و آزادانہ انتخابات کو یقینی بنانے میں ناکام رہا جس کی پاداش میں اسے فوری طور پر معطل کردیا جائے۔
زمبابوے کرکٹ بورڈ کو جمہوری انداز میں کرکٹ کے معاملات چلانے میں ناکامی پر معطل کیا گیا ہے۔ اس سے قبل بھی زمبابوے کرکٹ مشکلات سے دوچار رہی ہے۔ فیصلے کے مطابق زمبابوے کو آئی سی سی کی فنڈنگ بند کردی گئی ہے۔
#BREAKING The International Cricket Council meeting in London has suspended Zimbabwe Cricket citing government interference after the Sports Commission usurped the ZC board.
Decision means Zimbabwe will not receive ICC funding, and the country banned from ICC events pic.twitter.com/ix4OApYb25
— ZimLive (@zimlive) July 18, 2019
زمبابوے کی ٹیم ٹیسٹ اسٹیٹس رکھتی ہے اور اب معطلی کے دوران یہ ٹیم کسی آئی سی سی ایونٹ میں شرکت نہیں کرپائے گی۔ معطلی کے بعد زمبابوے کی اکتوبر میں ورلڈ ٹی ٹوئنٹی کوالیفائر میں شرکت مشکوک ہوگئی ہے۔
آئی سی سی نے زمبابوے کو تین ماہ میں جمہوری انداز میں کرکٹ بورڈ کی بحالی کا حکم دیا ہے۔
کرکٹ قوانین میں تبدیلی
آئی سی سی نے سالانہ اجلاس میں کرکٹ کے قوانین میں تبدیلی کی بھی منظوری دے دی ہے۔
کسی کھلاڑی کے سر پر چوٹ لگنے کی صورت میں ٹیم کو متبادل کھلاڑی شامل کرنے کی اجازت دے دی گئی ہے۔
کھلاڑی کی تبدیلی میچ ریفری کی منظوری سے مشروط ہوگی۔ اس نئے قانون کا اطلاق یکم اگست سے ہوگا یعنی ایجبیسٹن میں انگلینڈ اور آسٹریلیا کے درمیان ایشز سیریز کا پہلا ٹیسٹ نئے قانون کے تحت پہلا میچ ہوگا۔
قانون میں ایک اور اہم تبدیلی بھی کی گئی ہے اور وہ یہ کہ سلو اوور ریٹ پر اب کپتانوں کو معطل نہیں کیا جا سکے گا البتہ سلو اوور ریٹ کی مرتکب ٹیم ورلڈ ٹیسٹ چیمپئن شپ میں فی اوور دو چیمپئن شپ پوائنٹس سے محروم ہوجائے گی۔
لندن میں آئی سی سی اجلاس میں پاکستان کی نمائندگی چیئرمین پاکستان کرکٹ بورڈ (پی سی بی) احسان مانی اور ایم ڈی وسیم خان ںے کی۔
