امریکی نائب معاون وزیر خارجہ پانچ روزہ دورہ پاکستان پر پہنچ گئیں

اسلام آباد (ڈیلی اردو) امریکی نائب معاون وزیر خارجہ ایلس ویلزرات گئے پانچ روزہ دورہ پاکستان پر پہنچ گئیں ہیں ،دورے کے دوران عسکری و سول قیادت سے ملاقاتیں اور وفود کی سطح پر مذاکرات ہوں گے،افغان مفاہمتی عمل پر پیشرفت پر کلیدی گفتگو بھی کی جائے گی۔

سفارتی ذرائع کا کہنا ہے کہ امریکی نائب معاون وزیر خارجہ ایلس ویلز رات گئے پانچ روزہ دورہ پاکستان پر پہنچی،ایلس ویلز کے ہمراہ ایک اعلیٰ سطح امریکی وفد بھی ہے،اپنے دورے میں امریکی نائب معاون وزیرخارجہ عسکری و سول قیادت سے ملاقاتیں کریں گی اور وزارت خارجہ میں وفود کی سطح پر مذاکرات میں حصہ لیں گی۔

سفارتی ذرائع کے مطابق پاکستان بھارت کی جانب سے مقبوضہ کشمیر میں اٹھائے گئے حالیہ اقدامات کو مسترد کئے جانے سے متعلق امریکی وفد کو آگاہ کرے گا اس کے علاوہ بھارتی اقدامات سے خطے کے امن و سلامتی کو درپیش خطرات بارے بات ہوگی۔

سفارتی ذرائع کا مزید کہنا ہے کہ پاکستان لائن آف کنٹرول پر بھارت کی جانب سے کلسٹر بموں کے استعمال کے معاملہ کو بھی اٹھائے گا اس کے علاوہ افغان مفاہمتی عمل پر پیشرفت پر کلیدی گفتگو ہو گی اور علاقائی امن و سلامتی کے امور زیر غور آئیں گے۔

ذرائع کا کہنا ہے کہ امریکی نائب وزیرخارجہ ایلس ویلز کے دورے کا مقصد پاک، امریکا تعلقات کو مستحکم کرنا ہے۔

اپنا تبصرہ بھیجیں