پشاور (ڈیلی اردو) خیبر پختونخوا کے صوبائی دارالحکومت پشاور میں افغان شہری کو افغان پرچم آویزاں کرنے کے جرم میں گرفتار کرلیا۔
کیپٹل سٹی پولیس پشاور نے بورڈ بازار میں یوم آزادی کے ایام میں عوام میں اشتعال دلانے کی خاطر افغانستان کا پرچم آویزاں کرنیوالے مہاجر کو گرفتار کرلیا جبکہ سوشل میڈیا پر افغانی پرچم کی تصویر وائرل ہونے پر انتظامیہ کی دوڑیں لگ گئیں۔
تھانہ یونیورسٹی ٹاؤن کے ایس ایچ او بلال حسین کی مدعیت میں درج ایف آئی آر کے مطابق گزشتہ روز سوشل میڈیا پر ایک تصویر وائرل ہوئی جس میں ایک نوجوان بورڈ بازار میں لگے سائن بورڈ پر چڑھ کر یوم آزادی کے ایام میں پاکستانی عوام میں اشتعال دلانے کی خاطر افغانستان کا پرچم آویزاں کر رہا تھا جس کا نوٹس لیتے ہوئے فوری کاروائی کرکے نوجوان کو گرفتار کیا گیا۔
جس کی شناخت نعمت ولد سردار سکنہ افغانستان حال تاج آباد پشاور کے نام سے ہوئی پولیس کے مطابق گرفتار مہاجر کیخلاف دفعہ 153 اے کے تحت مقدمہ درج کیاگیا۔
دوسری جانب ٹاؤن تھری انتظامیہ نے بھی فوری ایکشن لیتے ہوئے افغانی پرچم اتار لیا۔
