168

مودی مقبوضہ کشمیر میں لاک ڈاؤن ختم کریں: ایمنسٹی انٹرنیشنل

اسلام آباد (ڈیلی اردو/نیوز ایجنسی) انسانی حقوق کے عالمی ادارے ایمنسٹی انٹرنیشنل نے جموں و کشمیر میں انسانی حقوق کی صورتحال پر گہری تشویش ظاہر کی ہے اور بھارتی وزیراعظم نریندر مودی سے مطالبہ کیا ہے کہ مقبوضہ وادی میں جاری لاک ڈائون ختم کیا جائے۔

ایمنسٹی انٹرنیشنل بھارت کے سربراہ اکار پٹیل نے ایک بیان میں کہا ہے کہ بھارت 15 اگست کو اپنا یوم آزادی منا رہا ہے ایسے موقع پر بھارتی وزیراعظم سمجھتے ہیں کہ جموں و کشمیر سے متعلق بھارتی عوام ان کے فیصلہ کی حمایت کرتے ہیں تو انہیں گزشتہ 12 روز سے جاری بلیک آئوٹ ختم کر دینا چاہیے۔

انہوں نے نریندر مودی پر زور دیا کہ انہیں خطے کے لوگوں کو سننا چاہیے اور ان سے مذاکرات کرنے چاہئیں جب ان کی زندگیاں حکومت کے فیصلے سے متاثر ہو رہی ہیں۔

انہوں نے کہا کہ اس وقت جموں و کشمیر کے عوام کو اپنے پیاروں سے رابطے اور اظہار رائے کی آزادی حاصل نہیں۔

پاکستان کی سرکاری نیوز ایجنسی اے پی پی کے مطابق ایمنسٹی انٹرنیشنل نے سابق وزیراعلیٰ جموں و کشمیر فاروق عبداﷲ، عمر عبداﷲ اور محبوبہ مفتی سمیت اپوزیشن کے سیاسی رہنماؤں اور کارکنوں کو قید کرنے پر بھی گہری تشویش ظاہر کی۔

انہوں نے کہا کہ پوری مقبوضہ وادی میں مواصلات کا نظام بند کرنا عالمی انسانی حقوق کی کھلی خلاف ورزی ہے۔

اس خبر پر اپنی رائے کا اظہار کریں

اپنا تبصرہ بھیجیں