بیجنگ (ڈیلی اردو/نیوز ایجنسی) چین نے جنرل قمر جاوید باجوہ کو آئندہ تین سال کیلئے سپہ سالار برقرار رکھنے کا خیر مقدم کرتے ہوئے کہا ہے کہ آرمی چیف جنرل قمر جاوید باجوہ غیر معمولی قائدانہ صلاحیتوں کے مالک ہیں۔
تفصیلات کے مطابق چین نے آرمی چیف جنرل قمر جاوید باجوہ کی مدت ملازمت میں توسیع کے معاملے پر اپنے ردعمل میں کہا ہے کہ جنرل قمر جاوید غیر معمولی قائدانہ صلاحیتیں رکھنے والے پاک فوج کے سربراہ ہیں۔
ترجمان چینی وزارت خارجہ نے کہا کہ جنرل قمر جاوید باجوہ چین کی حکومت اور فوج کے دیرینہ دوست ہیں، پاک چین تعلقات میں جنرل قمر جاوید باجوہ نے انتہائی مثبت کردار ادا کیا، یقین ہے کہ ان کی قیادت میں پاک فوج ملکی سلامتی میں بہترین کردار ادا کرتی رہے گی۔
انہوں نے کہا کہ پاک فوج خطے میں امن کیلیے کردار جاری رکھے گی۔
