اسلام آباد (ڈیلی اردو) آرمی چیف جنرل قمر جاوید باجوہ کی مدت ملازمت میں توسیع کے معاملے پر وزیر اعظم عمران خان کی جانب سے قوم سے خطاب کیے جانے کا امکان ہے۔
وزیر اعظم عمران خان کی زیر صدارت وزیر اعظم ہاﺅس میں اعلیٰ سطح کا ہنگامی اجلاس جاری ہے جس میں وفاقی وزرا اور پی ٹی آئی رہنما شریک ہیں۔ اجلاس میں آرمی چیف جنرل قمر جاوید باجوہ بھی موجود ہیں۔ وزیر اعظم کی زیر صدارت ہونے والے اجلاس میں آرمی چیف کی توسیع کے کیس کے حوالے سے مشاورت کی جارہی ہے۔
نجی ٹی وی نے ذرائع کے حوالے سے دعویٰ کیا ہے کہ آرمی چیف کی توسیع کے معاملے پر وزیر اعظم نے قوم کو اعتماد میں لینے کا فیصلہ کیا ہے ، اس سلسلے میں ان کی جانب سے قوم سے خطاب کیے جانے کا امکان ہے۔ وزیر اعظم کے خطاب کے حوالے سے قومی نشریاتی ادارے کو تیاریوں کی ہدایت کردی گئی ہے۔
