راولپنڈی (ڈیلی اردو/اے پی پی) کنٹرول لائن پر بھارتی فوج کی بلا اشتعال فائرنگ کے میں پاک فوج کے دو جوان شہید ہوگئے، پاک فوج کی بروقت جوابی کارروائی میں 3 بھارتی فوجی مارے گئے ہیں اور متعدد بھارتی فوجی زخمی ہونے کی اطلاعات ہیں۔
پاک فوج کے شعبہ تعلقات عامہ (آئی ایس پی آر) کے ڈائریکٹر جنرل میجر جنرل آصف غفور اپنے ٹویٹ میں کہا کہ گذشتہ 36 گھنٹوں کے دوران بھارت کی جانب سے کنٹرول لائن پر جنگ بندی معاہدے کی متعدد بار خلاف ورزیاں کی گئی ہیں۔
کنٹرول لائن کے حاجی پیر سیکٹر میں بھارتی فوج کی بلا اشتعال فائرنگ پر پاک فوج نے بھرپور جوابی کارروائی کی ہے۔ پاکستانی فورسز کی کارروائی میں صوبیدار سمیت 3 بھارتی فوجی ہلاک اور کئی زخمی ہوئے۔
کنٹرول لائن کے دیوا سیکٹر میں بھارتی فوج کی بلااشتعال فائرنگ سے پاک فوج کے 2 جوان بھی شہید ہوئے۔ شہید ہونے والے جوانوں میں نائب صوبیدار کانڈیرو اور سپاہی محمد احسن شامل ہیں۔
نائب صوبیدار کانڈیرو کا تعلق سکھر کی تحصیل پنوں عاقل اور محمد احسن کا تعلق جہلم کی تحصیل پنڈ دادن خان سے ہے۔
