گجرات (ڈیلی اردو) صوبہ پنجاب کے ضلع گجرات میں لندن سے آئی دو برطانوی نژاد بہنیں پراسرار طور پر گھر کے غسل خانہ سے مردہ پائی گئیں ہیں۔
تفصیلات کے مطابق افسوسناک واقعہ گجرات کے علاقے دولت نگر میں پیش آیا ہے، جہاں دس روز قبل پاکستان آنے والی 18 سالہ نادیہ اور 25 سالہ ماریہ واش روم میں مردہ پائی گئیں۔
لڑکیوں کے والدین کا اس حوالے سے موقف ہے کہ بچیوں کی موت گیزر کی گیس لیکج کے باعث ہوئی، پولیس اس حوالے سے مزید تحقیقات کر رہی ہے کہ آیا دونوں لڑکیوں کی اچانک پراسرار موت کے پیچھے کیا وجہ ہے، تاہم دونوں کی اچانک موت پر اہل خانہ غم سے نڈھال ہیں۔
پولیس ذرائع کا کہنا ہے کہ دونوں بہنیں برطانیہ میں مقیم تھیں تاہم چند روز قبل ہی پاکستان آئی تھیں۔
تھانہ دولت نگر میں لڑکیوں کی موت کا مقدمہ درج کرلیا گیا ہے۔ پولیس کا کہنا ہے کہ یہ واقعہ گزشتہ اتوار کو پیش آیا لیکن رپورٹ اب ہوا ہے۔
پولیس کا کہنا ہے کہ معاملے کی تحقیقات کر رہے ہیں، لاشوں کے نمونے لاہور بھجوا دیئے ہیں، رپورٹ آنے پر مزید کارروائی ہوگی۔
