بھارتی فوج کی ایل او سی پر بلا اشتعال فائرنگ سے 6 شہری زخمی ہوگئے

راولپنڈی (ڈیلی اردو) بھارتی فوج کی جانب سے لائن آف کنٹرول پر جنگ بندی کی خلاف ورزی کرتے ہوئے بلااشتعال فائرنگ کے واقعات میں ایک بچی اور دو خواتین سمیت 6 افراد زخمی ہوگئے۔

پاک فوج کے شعبۂ تعلقات عامہ (آئی ایس پی آر) کے مطابق کھوئی رٹا سیکٹر میں بھارتی فوج کی اشتعال انگیزی سے 11 سالہ بچی اور خاتون سمیت 5 شہری زخمی ہوئے۔

اس سے قبل بھارتی فوج نے ایل او سی کے رکھ چکری سیکٹر پر بلااشتعال فائرنگ کی جس کے نتیجے میں کرنی گاؤں کی رہنے والی خاتون شہری زخمی ہوگئی۔ آئی ایس پی آر کے مطابق بھارتی فوج نے شہری آبادی کو نشانہ بنایا تاہم پاک فوج نے بھارتی اشتعال انگیزی کو منہ توڑ جواب دیا۔

انہوں نے بتایا کہ پاک فوج نے بھارتی فائرنگ کا بھرپور جواب دیا۔

خیال رہے کہ بھارت کی جانب سے لائن آف کنٹرول پر بلا اشتعال فائرنگ کے واقعات میں اضافہ دیکھا جارہا ہے اور آئے روز آزاد کشمیر میں ایل او سی کے مختلف سیکٹرز پر بلااشتعال فائرنگ کی جاتی ہے۔

اس سے قبل 6 جولائی کو ایل او سی پر بھارتی فوج کی بلا اشتعال فائرنگ کے نتیجے میں 5 شہری زخمی ہوگئے تھے۔

بھارتی فوجیوں نے ایل او سی پر نکیال سیکٹر میں رات گئے شہری آبادی کو نشانہ بنایا تھا۔

اس سے ایک روز قبل یعنی 5 جولائی کو ایل او سی پر بھارتی فوج کی فائرنگ سے ایک شہری زخمی ہوگیا تھا۔

اسی طرح 25 جون کو ایل او سی کے کریلا سیکٹر میں بلااشتعال فائرنگ سے خاتون زخمی ہوگئی تھیں۔

آئی ایس پی آر کے مطابق رواں سال کے دوران اب تک بھارتی فوج 1623 مرتبہ ایل او سی کی خلاف ورزیاں کرچکی ہے۔

اپنا تبصرہ بھیجیں