تہران (ڈیلی اردو) ایران کے رہبر اعلیٰ (سپریم لیڈر) آیت اللہ علی خامنہ ای نے ملک میں تیار کردہ کورونا ویکسین لگوالی۔
I am truly grateful to all those who used their knowledge & experience & made scientific & practical efforts to provide the country with such a great, prestigious capability, i.e. the #CovidVaccine.#ProudlyIranian pic.twitter.com/NzOgP1VoEW
— Khamenei.ir (@khamenei_ir) June 25, 2021
ایران کے سرکاری ٹی وی کے مطابق علی خامنہ ای نے ایران کی تیار کردہ کورونا ویکسین کی پہلی خوراک لی۔
اس موقع پر ایران کے سپریم لیڈر کا کہنا تھا کہ ان کی بیرون ملک میں تیار کردہ کورونا ویکسین لینے میں کوئی دلچسپی نہیں اس لیے بہتر ہےکہ ایران کی اپنی ویکسین کا انتظار کیا جائے کیونکہ ہمیں اپنے قومی وقار پر فخر کرنا ہے۔
میڈیا رپورٹس کے مطابق ایران کے سپریم لیڈر نے جنوری میں امریکا اور برطانیہ کی کورونا ویکسین کی درآمد پر پابندی عائد کی تھی جس کی وجہ مغرب پر عدم اعتماد تھی۔
میڈیا رپورٹس میں بتایا گیا ہےکہ ایرانی فارماسیوٹیکل کمپنی شفا فارمڈ نے کوویران کے نام سے ویکسین تیار کی ہے جس کی گزشتہ برس دسمبر میں سیفٹی اور مؤثر سے متعلق اسٹڈی کی گئی۔
ایران نے گزشتہ ہفتے ملک میں اس ویکسین کی ہنگامی بنیادوں پر اس وقت منظوری دی جب اسے بڑی تعداد میں ویکسین درآمد کرنے میں مشکلات کا سامنا کرنا پڑا۔
ایران میں کورونا سے یومیہ اموات کی تعداد 115 سے تجاوز کرگئی ہے اور اب تک ملک میں83500 سے زائد افراد وائرس سے انتقال کرچکے ہیں۔
