اسلام آباد (ش ح ط) کاؤنٹر ٹیررازم ڈیپارٹمنٹ (سی ٹی ڈی) نے خیبر پختونخوا کے ضلع کوہاٹ میں کارروائی کرتے ہوئے کالعدم تنظیم تحریک طالبان پاکستان (ٹی ٹی پی) کے دہشت گرد کو گرفتار کر لیا۔
سی ٹی ڈی نے کوہاٹ ریجن میں کارروائی کرتے ہوئے مطلوب دہشتگرد کو گرفتار کر لیا۔ جو خیبر پختونخوا پولیس کو دہشتگردی کے کیس میں مطلوب تھا۔
سی ٹی ڈی کے مطابق ادارے نے لنک روڈ نزد زیر تعمیر میڈیکل کالج کے ڈی اے سے خفیہ اطلاع پر دہشت گرد سعید اللہ کو گرفتار کیا ہے۔
ملزم کے قبضے سے بھاری مقدار میں بارودی مواد، ڈیٹونیٹر، پریما کارڈ اور دیگر سامان بھی برآمد کیا گیا ہے۔
سی ٹی ڈی نے ملزم کو مزید تحقیقات کے لئے نامعلوم مقام پر منتقل کردیا ہے، ملزم سے مزید انکشافات کی توقع ہے۔
