کراچی (س ط ع) صوبہ سندھ کے صوبائی دارالحکومت کراچی میں واقع گلبائی پل کے قریب فائرنگ سے غیر ملکی باشندہ ڈرائیور سمیت زخمی ہو گیا، دونوں زخمیوں کو سول ہسپتال منتقل کر دیا گیا ہے، جہاں انہیں طبی امداد دی جا رہی ہے۔
پولیس ذرائع کے مطابق گلبائی پل کے نیچے موٹر سائیکل سوار افراد نے گاڑی پر فائرنگ کی، زخمی غیر ملکی چینی انجینئر ہے جسے 3 گولیاں لگی ہیں۔
ڈی آئی جی ساؤتھ زون جاوید اکبر کے مطابق گاڑی پر فائرنگ کس سمت سے کی گئی یہ واضح نہیں ہوا ہے، گاڑی پر 2 گولیاں لگی ہیں، جس میں 2 افراد سوار تھے۔
ایس ایس پی کیماڑی فدا جانوری کا کہنا ہے کہ اطلاعات کے مطابق دونوں افراد زخمی ہوئے ہیں، تاہم دونوں زخمیوں کی حالت خطرے سے باہر ہے۔
انہوں نے یہ بھی بتایا کہ کار میں ایک چینی باشندہ اور اس کا ڈرائیور موجود تھا، مزید تفصیلات حاصل کر رہے ہیں۔
