راولپنڈی (کاشف محمود) سیکیورٹی فورسز کی جنوبی وزیرستان میں دہشت گردوں کے خلاف کارروائی میں ایک مبینہ دہشت گرد ہلاک جبکہ دوسرے کو زخمی حالت میں گرفتار کر لیا گیا۔
پاکستان فوج کے شعبہ تعلقات عامہ (آئی ایس پی آر) کے مطابق گزشتہ رات جنوبی وزیرستان میں فوجی چیک پوسٹ کے قریبی علاقے سراردغہ میں 3 سے 4 مشتبہ دہشتگردوں کی نقل و حرکت دیکھی تھی، دہشت گردوں سے نمٹنے کیلئے فوری طور پر کوئیک ری ایکشن فورس روانہ ہوئی، موثر کارروائی کے ذریعے ایک دہشت گرد مارا گیا جبکہ ایک زخمی حالت میں پکڑا گیا۔ جس سے فوجی چوکی پر حملے کی منصوبہ بندی کا انکشاف ہوا ہے۔
دہشت گردوں کے ساتھ فائرنگ کے تبادلے کے دوران پاک فوج کے نائیک ضیاء الدین بھی ہلاک ہوئے۔
شعبہ تعلقات عامہ کے مطابق پاک فوج دہشتگردی کی لعنت کے خاتمے کیلئے پرعزم ہے۔
