راولپنڈی (کاشف محمود) سیکیورٹی فورسز نے شمالی وزیرستان میں آپریشن کرکے دو دہشتگردوں کو ہلاک کر دیا۔
پاکستانی فوج کے شعبہ تعلقاتِ عامہ آئی ایس پی آر کے مطابق دتہ خیل میں دہشتگردوں کی موجودگی کی خفیہ اطلاع پر آپریشن کیا گیا، فائرنگ کے تبادلے میں 2 دہشت گرد مارے گئے۔ ہلاک ہونے والے دہشت گردوں کی پناہ گاہ سے اسلحہ و بارود برآمد کیا گیا ہے، علاقے میں دہشتگردوں کے خاتمہ کیلئے آپریشن جاری ہے۔
خیال رہے کہ گزشتہ دنوں شمالی وزیرستان کے علاقے اسپین وام میں بھی سیکورٹی فورسز نے خفیہ اطلاع پر آپریشن کیا تھا جس میں ایک دہشت گرد مارا گیا تھا۔
