اسلام آباد (ڈیلی اردو/وی او اے) وزیرِ اعظم عمران خان نے پاکستان کے اہم ترین خفیہ ادارے انٹر سروسز انٹیلی جنس (آئی ایس آئی) کے نئے سربراہ کے تقرر کی منظوری دے دی ہے۔ نوٹیفکیشن کے مطابق لیفٹننٹ جنرل ندیم انجم کی تعیناتی کی منظوری دی گئی ہے۔
وزیرِ اعظم ہاؤس سے جاری ہونے والے نوٹیفکیشن میں کہا گیا ہے کہ لیفٹننٹ جنرل ندیم احمد انجم 20 نومبر 2021 کو اپنے عہدے کا چارج سنبھالیں گے اور موجودہ ڈی جی آئی ایس آئی اس وقت تک اپنی ذمے داریاں ادا کرتے رہیں گے۔
وزیرِ اعظم ہاؤس کے سوشل میڈیا پر جاری ہونے والے بیان میں کہا گیا ہے کہ نئے ڈی جی آئی ایس آئی کے تقرر کے لیے وزیرِ اعظم نے وزارتِ دفاع سے موصول ہونے والے فہرست میں شامل ناموں کے انٹرویو کیے تھے۔
وزیرِ اعظم ہاؤس کے بیان کے مطابق وزیرِ اعظم عمران خان اور پاکستان کی فوج کے سربراہ جنرل قمر جاوید باجوہ کے درمیان ملاقات میں آئی ایس آئی کے نئے سربراہ کے تقرر کے وقت میں تبدیلی اور نئے ڈائریکٹر جنرل کے انتخاب سے متعلق جاری مشاورتی عمل کا حصہ تھی۔
Chief of Army Staff General Qamar Javed Bajwa called on Prime Minister @ImranKhanPTI today.
The meeting was part of the ongoing consultation process between the Prime Minister and Chief of Army Staff about the timing of change of command in ISI and selection of the new DG ISI.
— Prime Minister's Office (@PakPMO) October 26, 2021
بیان کے مطابق وزیرِ اعظم ہاؤس کو ڈی جی آئی ایس آئی کے تقرر کے عمل میں وزارتِ دفاع سے ایک فہرست موصول ہوئی تھی۔
وزیرِ اعظم عمران خان نے فہرست میں شامل افسران کے انٹرویو کیے۔ اس سلسلے کے آخری مرحلے میں وزیرِ اعظم عمران خان اور آرمی چیف کے درمیان مشاورت ہوئی۔
وزیرِ اعظم ہاؤس کے مطابق اس طویل مشاورت کے بعد نئے ڈی جی آئی ایس آئی کے لیے لیفٹننٹ جنرل ندیم انجم کے نام کو منظور کیا گیا ہے۔ وہ 20 نومبر 2021 کو اپنی ذمے داریاں سنبھالیں گے۔
After this detailed consultative process, name of Lt..Gen. Nadeem Anjum was approved as new DG ISI.
The designate DG ISI shall assume charge on 20th November, 2021.
— Prime Minister's Office (@PakPMO) October 26, 2021
پاکستان میں چھ اکتوبر 2021 کو فوج میں ہونے والے تقرر و تبادلوں کے بعد مختلف قیاس آرائیوں نے جنم لیا تھا۔
اس دن پاکستان کی فوج کے شعبہ تعلقاتِ عامہ (آئی ایس پی آر) نے تقرر اور تبادلوں کا اعلان کیا تھا جن کے مطابق کور کمانڈر کراچی لیفٹننٹ جنرل ندیم احمد انجم کا نام ڈی جی آئی ایس آئی کے لیے تجویز کیا گیا تھا جس کی منظوری وزیرِ اعظم عمران خان نے اب دی ہے۔ جب کہ موجودہ ڈی جی آئی ایس آئی لیفٹننٹ جنرل فیض حمید کو کور کمانڈر پشاور تعینات کیا گیا ہے۔
وزیرِ اعظم کی جانب سے منظوری نہ ہونے کے باعث نئے ڈی جی آئی ایس آئی نے عہدے کا چارج نہیں سنبھالا تھا۔
اس بارے میں کئی اعلیٰ سطح کی ملاقاتیں بھی ہوئیں اور وزرا کے ایک وفد کی بھی عسکری قیادت سے ملاقات ہوئی جس میں ان امور پر بات چیت کی گئی تھی۔
تقرر اور تبادلوں پر عمل درآمد
آئی ایس پی آر کے اعلان میں کہا گیا تھا کہ جنرل فیض حمید کو کور کمانڈر پشاور، لیفٹننٹ جنرل محمد سعید کو کور کمانڈر کراچی، لیفٹننٹ جنرل نعمان محمود کو صدر نیشنل ڈیفنس یونیورسٹی تعینات کیا گیا ہے۔
اس کے ساتھ ساتھ لیفٹننٹ جنرل محمد عامر کو کور کمانڈر گوجرانوالہ جب کہ کور کمانڈر گوجرانوالہ لیفٹننٹ جنرل عاصم منیر کو کوارٹر ماسٹر جنرل مقرر کرنے اور میجر جنرل عاصم ملک کو لیفٹننٹ جنرل کے عہدے پر ترقی دے کر انہیں پاک فوج کا ایجوڈنٹ جنرل تعینات کرنے کا کہا گیا تھا۔
آئی ایس پی آر کے اعلان کردہ کچھ تعیناتیاں تعطل کا شکار تھیں کیوں کہ جنرل فیض حمید کے عہدہ چھوڑنے کے بعد لیفٹننٹ جنرل ندیم احمد انجم نے کراچی کور کی ذمے داریوں سے سبک دوش ہونا تھا اور لیفٹننٹ جنرل فیض حمید نے پشاورکور کی ذمے داریاں سنبھالنی تھیں۔
اسی طرح پشاور کے کورکمانڈر لیفٹننٹ جنرل نعمان نے اسلام آباد میں نیشنل ڈیفنس یونیرسٹی کے سربراہ کا عہدہ سنبھالنا تھا اور اس یونیورسٹی میں تعینات لیفٹننٹ جنرل سعید کور کمانڈر کراچی کی ذمے داریاں سنبھالنے کے منتظر تھے۔
ڈی جی آئی ایس آئی کے لیے تعیناتی کا نوٹیفکیشن نہ ہونے کی وجہ سے تین دیگر افسران بدستور اپنے عہدوں پر کام کر رہے تھے۔
نئے ڈی جی آئی ایس آئی کے نوٹیفکیشن کے بعد امکان ہے کہ آئندہ ماہ 20 نومبر کو تمام افسران اپنے نئے عہدوں پر کام شروع کر دیں گے۔
