پاک بھارت کشیدگی: ائیر پورٹس مزید 24 گھنٹے کیلئے بند رہیں گے

اسلام آباد (ڈیلی اردو) سول ایوی ایشن کی جانب سے پاکستانی فضائی حدود کے کچھ حصے مزید 24 گھنٹے کے لیے بند رکھنے کا فیصلہ کیا گیا ہے۔

سول ایوی ایشن کے نوٹم کے مطابق رحیم یار خان، سیالکوٹ، اور اسکردو ائیر پورٹس مزید 24 گھنٹے کے لیے بند رہیں گے جب کہ گلگت، سکھر اور مشرقی ائیر پورٹس کو بھی 24 گھنٹے کے لیے بند رکھا گیا ہے۔

نوٹم میں بتایا گیا ہے کہ ائیرپورٹس 8 مارچ کی دوپہر ایک بجے تک بند رہیں گے جب کہ پاکستانی فضائی حدود کو استعمال کرکے کسی اور فضائی حددو میں جانے پر بھی پابندی ہے۔

نوٹم کے مطابق جن ائیر پورٹس پر فلائٹ آپریشن جاری ہے اس میں 15 مارچ کی صبح 5 بجے تک توسیع کی گئی ہے جس کے تحت چترال، ملتان، کراچی، فیصل آباد، پشاور، لاہور، کوئٹہ اور اسلام آباد کے ائیرپورٹس پر 15 مارچ تک فلائٹ آپریشن جاری رہے گا۔

واضح رہے کہ گزشتہ دنوں پاکستان اور بھارت کے درمیان کشیدگی بڑھنے پر پاکستان کی فضائی حدود کو بند کرکے ملک بھر میں فلائٹ آپریشن معطل کردیا گیا تھا۔

اپنا تبصرہ بھیجیں