واشنگٹن (ڈیلی اردو/این این آئی) امریکہ نے جرمنی کو 35 عدد جدید ایف 35 جنگی طیاروں اور ان کے ایمونیشن دینے کی منظوری دے دی۔
میڈیا رپورٹس کے مطابق امریکہ نے جرمنی کے ہاتھ 4.8 بلین ڈالرز مالیت کے 35 عدد ایف 35 جنگی طیاروں اور طیاروں کے ایمونیشن کی فروخت کی منظوری دے دیا۔
امریکی دفاعی سلامتی تعاون ایجنسی نے اپنے ایک تحریری بیان میں کہا کہ وزارت خارجہ جرمنی کو 8.4 بلین ڈالرز مالیت کے جنگی طیارے فروخت کرنے پر رضامند ہو گیا ہے.
امریکی دفاعی سلامتی تعاون ایجنسی کے تحریری بیان میں کہا گیا ہے کہ جرمنی کو ایف 35 طیاروں کے ساتھ ان کا متعلقہ سامان اور گولہ بارود بھی فروخت کیا جائے گا، اور اس حوالے سے کانگریس کو بھی تفصیلی بریفنگ دے دی گئی۔ اس غیر معمولی فروخت میں جرمنی کو روایتی لینڈنگ اور ٹیک آف صلاحیت والے جدید ترین اے سیریز کے 35 عدد جنگی طیارے حاصل ہوں گے، جن کے ساتھ ایمونیشن اور 37 اقسام کے مختلف سامان بھی مہیا کیا جائے گا۔
جنگی ماہرین نے اس ڈیل پر معنی خیز انداز میں اپنی رائے کا اظہار کیا ہے کیونکہ یہ ڈیل جرمنی کی جانب سے یوکرین کو میزائل دفاعی سسٹمز کی فراہمی کے بعد ہوئی ہے۔
