جامشورو: کوٹری میں بم نصب کرتے ہوئے پھٹ گیا، دہشت گرد ہلاک

جامشورو (ڈیلی اردو) صوبہ سندھ کے ضلع جامشورو کے شہر کوٹری میں ڈپٹی کمشنر کے دفتر کے قریب ایک مشتبہ شخص دیسی ساختہ بم (آئی ای ڈی) لے جاتے ہوئے ہلاک ہوگیا۔

تفصیلات کے مطابق جامشورو کے علاقے کوٹری میں سڑک کنارے بم دھماکا ہوا۔ دھماکے میں بم نصب کرنے والا مارا گیا۔

پولیس کے مطابق کوٹری سائٹ ڈپٹی کمشنر آفس کے قریب دھماکا ہوا۔ بم کو سڑک کنارے نصب کرنے کی کوشش کی جارہی تھی کہ بم پھٹ گیا۔

بم ڈسپوزل اسکواڈ ،پولیس اور رینجرز کی بھاری نفری موقع پر پہنچ گئی۔

بم ڈسپوزل اسکواڈ کے مطابق بم ریموٹ کنٹرول الیکٹرک ڈیوائس سے منسلک تھا۔ ہلاک ہونے والا شخص بم نصب کرتے ہوئے دھماکے سے ہلاک ہوا۔

پولیس اور انتظامیہ نے واقعے کی تصدیق کرتے ہوئے مقتول کی شناخت اللہ بخش کھوکھر ولد مولا بخش کے نام سے کی ہے اور اس کے والد سائٹ پولیس اسٹیشن کوٹری میں بطور اے ایس آئی تعینات ہیں۔

جامشورو کے ایس ایس پی جاوید بلوچ نے بتایا کہ ملزم پانچ ماہ قبل لاپتا ہوا تھا لیکن اس کے اہلخانہ نے پولیس میں رپورٹ نہیں کی تھی، ان کے ہاتھ میں آئی ای ڈی پھٹ گیا جس کے نتیجے میں اس کے ہاتھ کا ایک ٹکڑا اڑ گیا۔

اس کے پاس ایک ریموٹ کنٹرول بھی تھا جسے اس ڈیوائس کو پھٹنے کے لیے استعمال کیا جانا تھا۔

محکمہ انسداد دہشت گردی نے اب تک کوئی مقدمہ درج نہیں کیا۔

بی ڈی ایس کے مطابق بم ریموٹ کنٹرول الیکٹرک ڈیوائس سے منسلک تھا۔

بم ڈسپوزل اسکواڈ کے ایک اہلکار نے بتایا کہ آئی ای ڈی بنانے کے لیے کنستر میں تقریباً 200 سے 300 گرام دھماکا خیز مواد اور بال بیئرنگ کا استعمال کیا گیا تھا، ڈپٹی کمشنر آفس سے کچھ فاصلے پر اس علاقے سے مین لائن اپ اور ڈاؤن کنٹری ریلوے ٹریک بھی گزر رہا ہے۔

اس خبر پر اپنی رائے کا اظہار کریں

اپنا تبصرہ بھیجیں