لکی مروت میں پولیس گاڑی پر فائرنگ، ایک اہلکار زخمی

لکی مروت (نمائندہ ڈیلی اردو) صوبہ خیبر پختونخوا کے ضلع لکی مروت میں سرائے نورنگ کی حدود میں پولیس موبائل پر فائرنگ سے ایک اہلکار زخمی جبکہ جوابی کارروائی میں ایک حملہ آور مارا گیا۔

پولیس کے مطابق لکی مروت میں تھانہ سرائے نورنگ کی حدود میں پولیس پارٹی پر فائرنگ کئی گئی ہے جس سے ایک پولیس اہلکار زخمی ہوا ہے جبکہ پولیس کی جوابی فائرنگ سے ایک حملہ آور بھی ہلاک ہوگیا ہے۔

پولیس پارٹی معمول کی گشت پر تھی کہ کوٹکہ شاہ جہاں کے قریب نامعلوم موٹر سائیکل سواروں نے پولیس پارٹی پر فائرنگ کی۔

فائرنگ سے پولیس اہلکار محب اللہ زخمی ہوا ہے، جنہیں تحصیل ہیڈکوارٹر ہسپتال سرائے نورنگ منتقل کردیا گیا ہے، تحصیل ہیڈ کوارٹر ہسپتال نورنگ کے سرجن ڈاکٹر فریداللہ خان نے بتایا کہ زخمی پولیس اہلکار کو 4 گولیاں لگی ہیں۔

پولیس ذرائع نے تصدیق کی ہے کہ ان کی جوابی فائرنگ سے ایک حملہ اور ہلاک ہوا ہے۔ حملہ آوروں کی موٹر سائیکل بھی پولیس نے قبضے میں لے لی ہے تاہم ہلاک ہونے والے حملہ آور کی شناخت ابھی تک نہ ہوسکی ہے۔ وقوعہ کے بعد پولیس نے علاقے میں ناکہ بندیاں کر دی ہیں اور پولیس کا سرچ آپریشن جاری ہے۔

اپنا تبصرہ بھیجیں