13

شمالی وزیرستان سے آئل کمپنی کے 4 مغوی ملازم بازیاب، 2 دہشت گرد ہلاک

میران شاہ (ڈیلی اردو) سکیورٹی فورسز نے کامیاب آپریشن کے دوران صوبہ خیبر پختونخوا کے قبائلی ضلع شمالی وزیرستان سے گزشتہ روز اغوا کیے گئے تیل کمپنی کے چاروں ملازمین کو بازیاب کرالیا، فائرنگ کے تبادلے میں 2 دہشت گرد مارے گئے جبکہ ایک اہلکار اور تیل کمپنی کے 2 ملازمین زخمی ہوئے۔

ذرائع کے مطابق فورسز کی جانب سے خفیہ اطلاع پر میرانشاہ کے علاقے ہمزونی میں خٹی کلی کے قریب آپریشن کرکے مغویوں کو بازیاب کرایا گیا۔

آپریشن کے دوران سپاہی زفران اور تیل کمپنی کے 2 ملازمین اغوا کاروں کی فائرنگ سے زخمی بھی ہوئے۔ جس کے بعد زخمیوں کو فوری طبی امداد کیلئے ایف ٹی سی ہسپتال میران شاہ منتقل کردیا گیا۔

سیکیورٹی ذرائع کے مطابق فائرنگ کے تبادلے میں 2 دہشت گرد ہلاک بھی ہوئے۔ ہلاک دہشت گردوں کی لاشیں سیکورٹی فورسز نے قبضے میں لے لیں۔ دہشت گردوں کی شناخت سے متعلق کوئی تفصیلات فی الحال میڈیا کے ساتھ شیئر نہیں کی گئی ہیں۔

واضح رہے کہ چاروں ملازمین کو جمعہ 20 جنوری کو اغوا کیا گیا تھا۔ چاروں ملازمین شمالی وزیرستان کے علاقے انغرکلی کے قریب سروے کیلئے گئے تھے، تاہم کام سے واپسی پر ملازمین کو نامعلوم مسلح افراد اغوا کرکے لے گئے تھے۔

اس خبر پر اپنی رائے کا اظہار کریں

اپنا تبصرہ بھیجیں