کراچی (نمائندہ ڈیلی اردو) صوبہ سندھ کے صوبائی حکومت کراچی میں کاؤنٹر ٹیررازم ڈیپارٹمنٹ (سی ٹی ڈی) نے کلفٹن اور ملحقہ علاقوں میں کارروائی کرکے ایک دہشت گرد کو گرفتار کرلیا۔
سی ٹی ڈی کے مطابق کارروائی میں کالعدم تنظیم سندھ ریوولوشن آرمی (ایس آر اے) کا ایک دہشت گرد گرفتار کیا گیا۔ جس کی شناخت ممتاز علی کے نام سے ہوئی۔
کاؤنٹر ٹیررازم ڈیپارٹمنٹ حکام نے مزید بتایا کہ دہشت گرد کے قبضے سے آئی ای ڈی ریموٹ کنٹرول بم مکمل تیار شدہ برآمد ہوا۔ ملزم نے تفتیش میں انکشاف کیا کہ اسے کراچی میں دو ٹارگٹ دیے گئے تھے۔
سی ٹی ڈی حکام کا کہنا تھا دہشت گرد نے دوران تفتیش انکشاف کیا کہ اسے پہلا ٹارگٹ کلفٹن میں نجی ریسٹورنٹ اور دوسرا ابراہیم حیدری پروجیکٹ دیا گیا تھا، دونوں مقامات پر غیر ملکی کام کرتے ہیں۔
سی ٹی ڈی کے مطابق دہشت گرد اپنے کلفٹن ٹارگٹ پر ریموٹ کنٹرول بلاسٹ کرنے جا رہا تھا تاہم پولیس نے کلفٹن میں نجی پارک کے قریب دہشت گرد کو گرفتار کرلیا، ملزم سے تفتیش جاری ہے مزید اہم انکشافات متوقع ہیں۔
