اسلام آباد (ڈیلی اردو/ڈی پی اے/نیوز ایجنسیاں) پاکستان میں پانچ فروری بروز بدھ منائے جانے والے یوم یکجہتی کشمیر کے موقع پر ملکی سیاسی رہنماؤں نے کشمیری عوام کے ساتھ یکجہتی کا اظہار کرتے ہوئے ان کے حق خود ارادیت کی حمایت کا اعادہ کیا۔
سرکاری نشریاتی ادارے ریڈیو پاکستان کے مطابق اس موقع پر پاکستانی صدر آصف علی زرداری اور وزیر اعظم شہباز شریف نے مطالبہ کیا کہ بین الاقوامی برادری بھارت پر دباؤ ڈالے کہ وہ خطے میں دیرپا امن کے قیام کے لیے بھارت کے زیر انتظام کشمیر کے عوام کو ان کے حق کے طور پر یہ موقع دے کہ وہ اپنے مستقبل کا آزادانہ فیصلہ خود کر سکیں۔
ہاکستان کے معروف اخبار ڈان نیوز کے مطابق پاک فوج کے شعبہ تعلقات عامہ (آئی ایس پی آر) کی جانب سے کہا گیا ہے کہ آرمی چیف نے مظفر آباد میں یادگار شہدا پر حاضری دی، انہوں نے آزادی کشمیر اور دفاع وطن کے لیے جانیں قربان کرنے والے شہدا کو خراج عقیدت پیش کیا۔
اخبار کے مطابق یوم یکجہتی کشمیر کے موقع پر آرمی چیف جنرل سید عاصم منیر نے کہا کہ کشمیر کا فیصلہ کشمیر کے عوام کو کرنا ہے، کشمیر کی خاطر تین جنگیں لڑی ہیں، 10 اور لڑنی پڑیں تو انشاء اللّٰہ لڑیں گے۔ آرمی چیف کا کہنا تھا کہ کشمیرکا فیصلہ کشمیر کی عوام کو کرنا ہے۔
آرمی چیف جنرل سید عاصم منیر نے شہدا کوخراج عقیدت پیش کرتے ہوئے کشمیریوں کے غیرمتزلزل عزم کی تعریف کی۔
اسی طرح پاکستانی فوج کے میڈیا ونگ آئی ایس پی آر کے ایک بیان میں کہا گیا کہ پانچ فروری کو یوم یکجہتی کشمیر کے موقع پر ملکی مسلح افوج اور ان کی قیادت کشمیریوں کے حق خود ارادیت کے لیے جدوجہد کی حمایت کا اعادہ کرتی ہیں۔
آئی ایس پی آر کے بیان میں کشمیر کے پُرعزم لوگوں کے ساتھ یکجہتی کا اظہار کرتے ہوئے بھارت کی جانب سے اس کے زیر انتظام جموں و کشمیر میں انسانی حقوق کی مبینہ مسلسل خلاف ورزیوں کی مذمت کرتے ہوئے انہیں خطے میں امن و استحکام کے لیے خطرہ قرار دیا گیا۔
بیان میں کہا گیا، ’’ہم کشمیری عوام کے جذبے کو خراج تحسین پیش کرتے ہیں، جنہوں نے ریاستی سرپرستی میں ہونے والی اور عشروں سے جاری انسانی حقوق کی سنگین خلاف ورزیوں کو برداشت کیا۔‘‘ بیان میں مزید کہا گیا کہ یہ مبینہ خلاف ورزیاں بین الاقوامی قانون اور بنیادی انسانی حقوق کی بھی صریح خلاف ورزی ہیں۔
آئی ایس پی آر کے مطابق آرمی چیف نے قائداعظم محمد علی جناح کے اس فرمان کو دہرایا کہ ’کشمیر پاکستان کی شہ رگ ہے‘ اور کہا کہ شہ رگ کو جسم سے کاٹنےکا مطلب زندگی کا خاتمہ ہے۔
’بھارتی فوج کے بیانات مایوسی کی علامت،‘ پاکستانی آرمی چیف
دریں اثنا پاکستان فوج کے سربراہ جنرل عاصم منیر نے منگل کو راولپنڈی میں کور کمانڈرز کانفرنس سے خطاب میں کہا کہ بھارتی فوج کے بیانات ’’بڑھتی ہوئی مایوسی‘‘ کی نشاندہی کرتے ہیں۔
انہوں نے دعویٰ کیا کہ نئی دہلی کے بھارت کے زیر انتظام کشمیر سے متعلق بیانات کا مقصد بھارتی عوام اور بین الاقوامی برادری کی توجہ اصل حقائق سے ہٹانا ہے۔
پاکستان بھر میں یوم یکجہتی کشمیر
پاکستان بھر میں آج یوم یکجہتی کشمیرمنایا جا رہا ہے۔ کشمیر ڈے پر ملک بھر میں مختلف سرکاری و غیر سرکاری اور مذہبی تنظیموں کی جانب سے کشمیری مسلمانوں کے ساتھ اظہار یکجہتی کے لیے جلسے، جلوس اور ریلیاں نکال کر کشمیریوں کے ساتھ یکجہتی کا اظہار کیا جا رہا ہے۔
پاکستان کی وفاقی کابینہ سیکریٹریٹ سے جاری کردہ ایک نوٹیفیکیشن میں کہا گیا کہ 5 فروری 2025 بروز بدھ یومِ کشمیر کے موقع پر ملک بھر میں عام تعطیل ہو گی اور تمام سرکاری دفاتر بند رہیں گے۔
خیال رہے کہ 5 اگست 2019 کو بھارتی حکومت نے بھارت کے زیر انتظام جموں و کشمیر کی خصوصی حیثیت سے متعلق ملکی آئین کا آرٹیکل 370 منسوخ کر دیا تھا۔ اس کے بعد نئی دہلی میں مودی حکومت نے نہ صرف جموں و کشمیر کا خصوصی ریاست کا درجہ ختم کر دیا تھا بلکہ جموں و کشمیر کو مرکز کے زیر انتظام دو حصوں میں تقسیم بھی کر دیا تھا۔
