ڈی جی خان (نمائندہ ڈیلی اردو) صوبہ پنجاب کے ضلع ڈیرہ غازی خان کے سرحدی علاقے تونسہ میں پولیس چیک پوسٹ پر دہشت گردوں نے حملہ کیا، تاہم پولیس کی جوابی کارروائی میں ایک دہشت گرد ہلاک ہوگیا جبکہ دیگر فرار ہونے میں کامیاب ہوگئے۔
ڈسٹرکٹ پولیس آفیسر (ڈی پی او) سید علی کاظمی کے مطابق جھنگی کے علاقے میں دہشت گردوں نے پولیس چیک پوسٹ پر راکٹ فائر کیے، جس کے بعد دونوں طرف سے فائرنگ کا تبادلہ ہوا۔ واقعے کے بعد مزید پولیس نفری طلب کرلی گئی۔
ڈی پی او نے بتایا کہ پولیس نے تھرمل کیمروں کی مدد سے دہشت گردوں کا مقابلہ کیا، جبکہ حملے میں کوئی جانی نقصان نہیں ہوا۔ پولیس نے فرار ہونے والے حملہ آوروں کی تلاش کے لیے سرچ آپریشن شروع کر دیا ہے۔
