اسلام آباد (ڈیلی اردو) پاکستان نے لائن آف کنٹرول (ایل او سی) پر فضائی حدود کی خلاف ورزی کرنے والے ایک بھارتی کواڈ کاپٹر کو مار گرانے کا دعویٰ کیا ہے۔
پاکستانی سکیورٹی ذرائع کے مطابق، انڈین کواڈ کاپٹر بھمبھر کے علاقے میں واقع مناور سیکٹر میں جاسوسی کی غرض سے پاکستانی حدود میں داخل ہوا جس پر اسے نشانہ بنایا گیا۔
یہ واقعہ ایسے وقت میں پیش آیا ہے جب دونوں ممالک کے درمیان تعلقات میں غیر معمولی کشیدگی پائی جاتی ہے۔ 22 اپریل کو انڈیا کے زیرِ انتظام کشمیر کے علاقے پہلگام میں ہونے والے ایک دہشتگرد حملے میں 26 سیاح ہلاک ہوئے تھے، جس کے بعد انڈیا نے پاکستان کے خلاف سخت اقدامات کیے۔
انڈین حکومت نے حملے کے بعد سندھ طاس معاہدہ (Indus Waters Treaty) کو معطل کرتے ہوئے پاکستان کے ساتھ پانی کی تقسیم کا نظام روک دیا۔ اس کے علاوہ واہگہ-اٹاری سرحد کو بند کر دیا گیا، ویزا سہولیات واپس لی گئیں اور دونوں ملکوں کے درمیان سفارتی روابط بھی محدود کر دیے گئے۔
ردعمل میں پاکستان نے بھی متعدد اقدامات کا اعلان کیا ہے، جن میں تمام دو طرفہ معاہدے، بشمول شملہ معاہدہ، کو معطل کرنا، فضائی و زمینی سرحد بند کرنا، انڈیا کے لیے فضائی حدود کے استعمال پر پابندی لگانا اور سفارتی عملے کی سطح محدود کرنا شامل ہیں۔ پاکستان نے انڈین دفاعی اتاشیوں اور ان کے معاونین کو ملک چھوڑنے کا بھی حکم دیا ہے۔
قومی سلامتی کمیٹی نے انڈیا کی جانب سے سندھ طاس معاہدہ معطل کرنے کے فیصلے کو مسترد کرتے ہوئے اسے ایک ممکنہ جنگی اقدام قرار دیا ہے۔ کمیٹی نے خبردار کیا ہے کہ اگر پاکستان کے حصے کے پانی کے بہاؤ کو روکا گیا یا اس کا رخ موڑنے کی کوشش کی گئی تو اس کا بھرپور جواب دیا جائے گا۔
