ڈی آئی خان + خار(ڈیلی اردو رپورٹ) خیبر پختونخوا کے مختلف علاقوں میں دہشتگردی کی تازہ کارروائیوں کے دوران سیکیورٹی فورسز اور شدت پسندوں کے درمیان جھڑپیں ہوئیں، جبکہ ایک راکٹ شہری آبادی پر گرنے سے تین بچے زخمی ہو گئے۔
ڈیرہ اسماعیل خان کی تحصیل درابن میں کلاچی موڑ کے قریب ڈی ایس پی سید مرجان کی گاڑی کو اُس وقت نشانہ بنانے کی کوشش کی گئی جب وہ معمول کے گشت پر تھے۔ مقامی ذرائع کے مطابق گاڑی کے قریب دھماکہ ہوا جس سے گاڑی کو نقصان پہنچا، تاہم خوش قسمتی سے ڈی ایس پی محفوظ رہے۔ واقعے کے فوراً بعد سیکیورٹی فورسز نے علاقے کو گھیرے میں لے کر تحقیقات کا آغاز کر دیا ہے۔
اسی ضلع کی تحصیل کلاچی کے علاقے نیا گڑہ میں سیکیورٹی فورسز نے خفیہ اطلاع پر بروقت کارروائی کی۔ اطلاعات کے مطابق دہشتگردوں نے سویلین گاڑیوں میں سوار سیکیورٹی اہلکاروں کی خفیہ ٹیم کو نشانہ بنانے کی کوشش کی، تاہم اہلکاروں نے بروقت ردعمل دیتے ہوئے ایک دہشتگرد کو موقع پر ہی ہلاک کر دیا جبکہ دوسرا دہشتگرد زندہ گرفتار کر لیا گیا۔ کارروائی کے دوران دو ہتھیار، ایک میموری کارڈ اور دو موبائل فون برآمد کیے گئے۔
دوسری جانب باجوڑ کی تحصیل ماموند کے علاقے برہ لغڑئی میں سیکیورٹی فورسز اور عسکریت پسندوں کے درمیان شدید جھڑپ کے دوران شدت پسندوں کی جانب سے فائر کیا گیا ایک راکٹ قریبی آبادی پر جا گرا، جس کے نتیجے میں تین معصوم بچے زخمی ہو گئے۔ زخمی بچوں کو فوری طور پر قریبی ہسپتال منتقل کر دیا گیا ہے جہاں ان کا علاج جاری ہے۔
