بلوچستان: پنجگور میں علیحدگی پسندوں کا حملہ، 10 فوجی ہلاک، 11 زخمی، 3 لاپتہ

واشنگٹن (ش ح ط) پاکستان کے شورش زدہ صوبے بلوچستان کے ضلع پنجگور کے علاقے گوَرگو میں بلوچ علیحدگی پسندوں کے مربوط حملے میں پاکستانی سیکیورٹی فورسز کے کم از کم 10 اہلکار ہلاک، افسر سمیت 11 زخمی، جبکہ تین اہلکار لاپتہ ہو گئے ہیں۔ حملہ آوروں نے فوج کے 91 ونگ کیمپ کو نشانہ بنایا۔

عسکری ذرائع کے مطابق زخمی  ہونے والوں میں کیپٹن اسامہ بھی شامل ہیں، جبکہ زخمی اہلکاروں میں متعدد کی حالت تشویشناک بتائی جا رہی ہے۔ حملے کے دوران شدت پسندوں نے سیکیورٹی فورسز کی مواصلاتی سہولیات کو پہلے نشانہ بنایا اور فوری ردعمل دینے والی ٹیم کو بھی گھات لگا کر روکا۔

سرکاری ذرائع کے مطابق جوابی کارروائی میں متعدد حملہ آور مارے گئے، جن میں سے کم از کم آٹھ کی لاشیں موقع پر دیکھی گئیں، تاہم حملہ آور اپنے ساتھیوں کی لاشیں اٹھا کر فرار ہونے میں کامیاب ہو گئے۔ 

سرکاری ذرائع کے مطابق حملہ آوروں کی تعداد 80 سے زائد بتائی جا رہی ہے، جو 11 زمیاد گاڑیوں میں سوار ہوکر آئے تھے۔ فورسز کی جانب سے علاقے میں سرچ آپریشن جاری ہے۔