خیبر میں سنائپر حملہ، سیکیورٹی اہلکار ہلاک، جنوبی وزیرستان کے دونوں اضلاع میں کرفیو نافذ

پشاور (ڈیلی اردو رپورٹ) صوبہ خیبر پختونخوا کے قبائلی ضلع خیبر کے علاقے میں سیکیورٹی فورسز کی چیک پوسٹ پر شدت پسندوں کے حملے میں ایک اہلکار ہلاک ہو گیا۔ حکام کے مطابق سنگر چیک پوسٹ پر شدت پسندوں نے سنائپر گن سے حملہ کیا، جس کے نتیجے میں سیکیورٹی اہلکار حکمت خان موقع پر ہی ہلاک ہو گئے۔

ادھر سیکیورٹی خدشات کے پیش نظر جنوبی وزیرستان کے دونوں اضلاع، لوئر اور اپر میں کرفیو نافذ کر دیا گیا ہے۔ ضلعی انتظامیہ کے مطابق ممکنہ حملوں کو روکنے کے لیے سخت حفاظتی اقدامات کیے جا رہے ہیں۔ دونوں اضلاع کے ڈپٹی کمشنرز کی جانب سے جاری کردہ نوٹیفکیشن کے مطابق متعدد راستے صبح 6 بجے سے شام 6 بجے تک بند رہیں گے۔

حکام کا کہنا ہے کہ سیکیورٹی ادارے الرٹ ہیں اور کسی بھی ناخوشگوار واقعے سے نمٹنے کے لیے اقدامات جاری ہیں۔