سوات میں پولیس و سی ٹی ڈی کی کاروائی، 2 دہشتگرد زخمی

سوات(ڈیلی اردو) صوبہ خیبر پختونخوا کے ضلع سوات میں پولیس اورسی ٹی ڈی کی کارروائی میں 2دہشت گرد زخمی ہو گئے ۔

ذرائع کے مطابق خفیہ اطلاعات پرریجنل پولیس اور سی ٹی ڈی کی ٹیموں نے سوات کے دشوار گزار پہاڑی علاقے تحصیل مٹہ کے مختلف مقامات پر سرچ آپریشن شروع کیا ۔

سرچ آپریشن کے دوران تھانہ گوالیری جارگو کی پہاڑیوں میں پولیس کا دہشت گردوں سے آمنا سامنا اس دوران پولیس و سی ٹی ڈی کے جوانوں نے مقابلہ کرتے ہوئے 2 شرپسندوں کو زخمی کیاجبکہ دیگر دہشت گرد زخمی ساتھیوں کو لے کر فرار ہو گئے ۔دہشتگردوں کی گرفتاری کیلئے سوات پولیس، ایلیٹ فورس اور سی ٹی ڈی نے علاقے میں مشترکہ سرچ آپریشن شروع کردیا ہے۔

آئی جی خیبر پختونخوا ذوالفقار حمید نے کامیاب کارروائی پر پولیس اور سی ٹی ڈی اہلکاروں کو شاباش دیتے ہوئے صوبہ بھر کے ریجنل اور ضلعی پولیس کو چوکس رہنے کے احکامات جاری کئے ۔انہوں نے کہا کہ دہشتگردوں کیلئے خیبرپختونخوا میں کوئی جگہ نہیں، ہر جگہ پیچھا کر کے عوام کو ان کی شر انگیزی سے نجات دلائیں گے۔