شمالی وزیرستان میں شدت پسندوں کا حملہ،لیفٹیننٹ سمیت 3 فوجی ہلاک، 7 اہلکار زخمی

واشنگٹن (ش ح ط) خیبر پختونخوا کے قبائلی ضلع شمالی وزیرستان کی تحصیل شوال میں شدت پسندوں نے سیکورٹی فورسز کی ایک چیک پوسٹ پر حملہ کیا، جس کے نتیجے میں پاک فوج کے ایک افسر سمیت تین اہلکار ہلاک اور سات زخمی ہو گئے۔

سیکورٹی ذرائع کے مطابق ہلاک ہونے والوں میں لیفٹیننٹ دانیال، نائب صوبیدار کاشف اور سپاہی حمید اللہ شامل ہیں۔ زخمیوں کو فوری طور پر طبی امداد کے لیے قریبی فوجی اسپتال منتقل کر دیا گیا ہے۔

پاکستانی فوج کے شعبہ تعلقات عامہ آئی ایس پی آر نے اس واقعے کے بارے میں ابھی تک کوئی بیان جاری نہیں کیا۔

یہ حملہ ایک ایسے وقت میں ہوا ہے جب شمالی وزیرستان میں عسکریت پسندوں کی سرگرمیوں میں حالیہ دنوں میں تیزی دیکھی جا رہی ہے۔ چند ہفتے قبل بھی اسی علاقے میں سیکیورٹی فورسز اور عسکریت پسندوں کے درمیان جھڑپوں میں کئی افراد ہلاک ہو چکے ہیں۔

یاد رہے کہ رواں سال کے دوران شمالی وزیرستان میں کئی حملے ہو چکے ہیں، جن میں نہ صرف فوجی اہلکار بلکہ عام شہری بھی متاثر ہوئے ہیں۔ سیکورٹی ادارے اس بات کا اعادہ کرتے رہے ہیں کہ وہ شدت پسندوں کے خلاف کارروائیاں جاری رکھیں گے۔