ٹانک میں اغواء شدہ سرکاری اہلکاروں کو قبائلی عمائدین کے ذریعے بازیاب کرا لیا گیا

پشاور(ڈیلی اردو )خیبرپختونخواہ ضلع ٹانک میں حالیہ اغواء کے واقعے میں لاپتہ ہونے والے پانچ سرکاری اہلکاروں کو مقامی جرگے کی کوششوں کے نتیجے میں بازیاب کرا لیا گیا۔ یہ واقعہ رواں ماہ کی ابتدا میں پیش آیا تھا جب ناکہ بندی کے دوران نامعلوم مسلح افراد نے ان اہلکاروں کو زبردستی اپنے ہمراہ لے جایا تھا۔

ذرائع کے مطابق، واقعے کے بعد مقامی قبائلی عمائدین اور پولیس نے مشترکہ حکمت عملی اپناتے ہوئے اغواء کاروں سے مذاکرات کا آغاز کیا۔ مسلسل کوششوں کے بعد اغواء کاروں نے آج صبح تقریباً پانچ بجے تمام مغوی اہلکاروں کو بحفاظت رہا کر دیا، جنہیں جرگے کے زریعے مقامی انتظامیہ کے حوالے کیا گیا۔

رہائی پانے والے اہلکاروں میں عدنان ولد نواب، شعیب ولد مرزل، خانے ولد عباد، رضوان ولد سارکہ اور گوہر علی شامل ہیں۔ ذرائع کا کہنا ہے کہ مذکورہ اہلکار عسکری اداروں سے وابستہ تھے، تاہم ان کی رہائی پر کسی قسم کی تاوان یا جھڑپ کی اطلاع موصول نہیں ہوئی۔

علاقے میں اس پیشرفت کو جرگہ سسٹم اور مقامی روایت پر مبنی ثالثی کی کامیاب مثال قرار دیا جا رہا ہے۔