پشاور میں پولیس گاڑی پر خودکش دھماکا: سب انسپکٹر سمیت 3 پولیس اہلکار ہلاک، 2 زخمی

پشاور (ڈیلی اردو) خیبر پختونخوا کے دارالحکومت پشاور میں رنگ روڈ پر پولیس گاڑی کو خودکش دھماکے کا نشانہ بنایا گیا، جس کے نتیجے میں سب انسپکٹر سمیت تین پولیس اہلکار ہلاک جبکہ دو زخمی ہو گئے۔

تفصیلات کے مطابق یہ واقعہ تھانہ چمکنی کی حدود میں مال مویشی منڈی کے قریب برلب نہر پیش آیا، جہاں پولیس موبائل کو نشانہ بناتے ہوئے خودکش دھماکہ کیا گیا۔ ابتدائی اطلاعات کے مطابق دھماکے میں اے ایس آئی لائق زادہ اور کانسٹیبل عالمزیب موقع پر ہلاک ہو گئے، جبکہ تین اہلکار زخمی ہوئے جن میں انعام اللہ (بیلٹ نمبر 5613 آئی ایچ سی)، مہتاب خان (بیلٹ نمبر 381) اور پولیس موبائل کا ڈرائیور شامل ہیں۔ بعد ازاں ایک زخمی اہلکار دم توڑ گیا جس کے بعد ہلاکتوں کی تعداد تین ہو گئی۔

واقعے کی اطلاع ملتے ہی ریسکیو ٹیمیں اور سیکیورٹی ادارے موقع پر پہنچے، اور زخمیوں کو فوری طور پر ہسپتال منتقل کیا گیا۔ اسپتال ذرائع کے مطابق ایک زخمی کی حالت تشویشناک ہے۔

پولیس اور بم ڈسپوزل اسکواڈ نے جائے وقوعہ کو گھیرے میں لے کر شواہد اکٹھے کرنے شروع کر دیے ہیں۔ واقعے کی تحقیقات جاری ہیں جبکہ حملہ آور کی شناخت اور دہشت گردی میں ملوث عناصر کا سراغ لگانے کے لیے کوششیں تیز کر دی گئی ہیں۔