پنجاب: ڈیرہ غازی خان میں دہشت گردوں کا حملہ، 5 مزدور اغوا

لاہور (بیورو رپورٹ) صوبہ پنجاب کے ضلع ڈیرہ غازی خان میں تھانہ وہوا کی حدود میں دہشت گردوں نے سڑک کی تعمیر پر کام کرنے والے پانچ مزدوروں کو اغوا کر لیا ہے۔ واقعہ بستی کوٹ مبارک کے قریب اس وقت پیش آیا جب یہ مزدور زیر تعمیر سڑک پر اپنے معمول کے کام میں مصروف تھے۔

سیکیورٹی ذرائع کے مطابق اغوا کیے گئے افراد میں تین تعمیراتی کارکن، ایک لوڈر آپریٹر اور ایک ڈمپر ڈرائیور شامل ہیں۔ واقعے کے بعد سیکیورٹی فورسز نے فوری طور پر علاقے میں سرچ آپریشن کا آغاز کر دیا ہے۔

ابتدائی اطلاعات کے مطابق دہشت گردوں نے منصوبہ بندی کے تحت مزدوروں کو نشانہ بنایا اور انہیں اس وقت اغوا کیا جب سیکیورٹی کی موجودگی نسبتاً کم تھی۔ ذرائع کا کہنا ہے کہ مزدور ایک سرکاری ترقیاتی منصوبے کے تحت کام کر رہے تھے، جس کا مقصد دور افتادہ علاقوں میں بنیادی انفراسٹرکچر کی بہتری ہے۔

علاقے میں سیکیورٹی فورسز، پولیس اور قانون نافذ کرنے والے دیگر اداروں نے مشترکہ کارروائی شروع کر دی ہے۔ مقامی انتظامیہ کے مطابق متاثرہ خاندانوں سے رابطہ کیا جا رہا ہے اور تمام تر وسائل بروئے کار لائے جا رہے ہیں تاکہ مغوی مزدوروں کو جلد بازیاب کرایا جا سکے۔

تاحال کسی گروہ نے واقعے کی ذمہ داری قبول نہیں کی، تاہم حکام دہشت گرد تنظیم تحریک طالبان پاکستان کے ممکنہ کردار پر تحقیقات کر رہے ہیں۔

واضح رہے کہ ماضی میں بھی قبائلی سرحد سے متصل علاقوں میں ترقیاتی منصوبوں پر کام کرنے والے مزدوروں اور عملے کو نشانہ بنایا جاتا رہا ہے، جس کے بعد حکام نے ان علاقوں میں حفاظتی اقدامات سخت کرنے کا اعلان کیا تھا۔