ڈیرہ اسماعیل خان: شیعہ نوجوان اغواء ، مقدمہ درج

پشاور(ڈیلی اردو ) خیبرپختونخواہ کے جنوبی ضلع ڈیرہ اسماعیل خان کے نواحی علاقے کوٹلہ سیدان سے تعلق رکھنے والا ایک 26 سالہ شیعہ نوجوان پراسرار طور پر لاپتہ ہو گیا ہے، جس کے بعد تھانہ ٹاؤن پولیس نے اغواء کا مقدمہ درج کر لیا ہے۔ مغوی نوجوان کی شناخت سید سلیمان حیدر کے نام سے ہوئی ہے، جو گزشتہ روز سے لاپتہ ہے۔

ذرائع کے مطابق سید سلیمان حیدر معمول کے مطابق اپنے گھر سے نکلا تھا، مگر شام تک واپس نہ آیا۔ اہلِخانہ نے خود تلاش کرنے کی کوشش کی، تاہم ناکامی کے بعد پولیس کو اطلاع دی گئی۔ پولیس نے ابتدائی تفتیش اور اہلِ خانہ کی درخواست پر اغواء کی دفعات کے تحت مقدمہ درج کر کے تفتیش شروع کر دی ہے۔

اس واقعے کے بعد علاقے میں خوف و ہراس کی فضا پھیل گئی ہے، خاص طور پر شیعہ برادری میں تشویش پائی جا رہی ہے۔

باوثوق ذرائع کے مطابق یہ پہلا واقعہ نہیں ہے، اس سے قبل 2010 میں مغوی نوجوان کے خاندان کے ایک قریبی شخص کو بھی کالعدم تنظیم تحریک طالبان پاکستان (ٹی ٹی پی) نے اغواء کیا تھا، جو بعد ازاں کئی مہینے کے بعد بازیاب ہوا تھا۔