ڈیرہ اسماعیل خان: آپریشن میں میجر سمیت 4 اہلکار، 2 شدت پسند اور 3 سویلین ہلاک

پشاور (ڈیلی اردو رپورٹ) صوبہ خیبر پختونخوا کے ضلع ڈیرہ اسماعیل خان کے علاقے کھوئی بہارہ میں سیکیورٹی فورسز نے انٹیلی جنس معلومات کی بنیاد پر کالعدم تحریک طالبان پاکستان (ٹی ٹی پی) کے خلاف ایک کارروائی کی۔ فوجی حکام کے مطابق اس آپریشن کے دوران پانچ مطلوب دہشتگرد ہلاک کر دیے گئے، جن کے قبضے سے جدید اسلحہ اور بھاری مقدار میں گولہ بارود برآمد ہوا۔

ہلاک دہشتگرد اغواء برائے تاوان، بھتہ خوری، دہشتگردی اور سیکیورٹی فورسز پر حملوں سمیت کئی سنگین وارداتوں میں ملوث تھے اور ریاستی اداروں کو طویل عرصے سے مطلوب تھے۔

ہلاک دہشت گردوں کا تعلق کالعدم تحریک طالبان پاکستان گنڈا پور گروپ سے بتایا جاتا ہے۔

سیکیورٹی ذرائع کے مطابق آپریشن کے دوران شدید فائرنگ کا تبادلہ ہوا جس میں ایک میجر سمیت چار سیکیورٹی اہلکار بھی ہلاک ہو گئے۔

دوسری جانب مقامی ذرائع کا دعویٰ ہے کہ کارروائی کے دوران مبینہ طور پر تین عام شہری بھی ہلاک ہوئے ہیں۔

عسکری ذرائع کے مطابق فورسز نے علاقے کو کلیئر کرنے کے بعد سرچ آپریشن مکمل کر لیا ہے۔