کرک میں شدت پسندوں کا حملہ، تین ایف سی اہلکار اور ایک ڈرائیور ہلاک

کرک (نمائندہ ڈیلی اردو) پاکستان کے شورش زدہ صوبے خیبرپختونخوا کے ضلع کرک میں واقع گرگری آئل فیلڈ پر شدت پسندوں کے حملے میں فرنٹیئر کور (ایف سی) کے تین اہلکار اور ان کے ہمراہ ڈیوٹی پر تعینات ایک ڈرائیور ہلاک ہو گئے ہیں۔

سکیورٹی ذرائع کے مطابق ہلاک ہونے والے اہلکاروں کا تعلق لکی مروت اور ٹانک سے ہے۔ یہ اہلکار آئل فیلڈ کی سکیورٹی پر مامور تھے جب نامعلوم شدت پسندوں نے ان پر اچانک فائرنگ شروع کر دی۔ واقعے کے فوری بعد سکیورٹی فورسز نے علاقے کو گھیرے میں لے کر سرچ آپریشن کا آغاز کر دیا۔

حملے کی ذمہ داری تاحال کسی تنظیم نے قبول نہیں کی۔ سکیورٹی ادارے اور مقامی انتظامیہ واقعے کی تحقیقات کر رہے ہیں، جبکہ ہلاک شدگان کی میتیں آبائی علاقوں روانہ کی جا چکی ہیں۔

لکی مروت میں دو لاشیں برآمد، ایک اور ایف سی اہلکار فائرنگ میں ہلاک

ادھر لکی مروت کے محلہ ریلوے سٹیشن کے قریب لکی پل سے دو افراد کی گولیوں سے چھلنی لاشیں برآمد ہوئی ہیں۔ پولیس کے مطابق مقتولین کی شناخت تاحال نہیں ہو سکی۔

اسی علاقے میں ایک اور واقعے میں چھٹی پر گھر آئے ایف سی اہلکار عطا الرحمن کو گھر کے ساتھ بیٹھک میں نامعلوم مسلح افراد نے فائرنگ کر کے ہلاک کر دیا۔ پولیس کے مطابق واقعے کی تحقیقات جاری ہیں اور مختلف پہلوؤں پر غور کیا جا رہا ہے۔