باجوڑ امن جرگے اور طالبان کے درمیان مذاکرات، پاکستانی طالبان نے مہلت مانگ لی

واشنگٹن (ش ح ط) پاکستان کے قبائلی ضلع باجوڑ میں امن جرگے اور تحریک طالبان پاکستان (TTP) کے درمیان مذاکرات کا پہلا دور اختتام پذیر ہو گیا ہے۔ طالبان نے کہا ہے کہ وہ جرگے کا پیغام اپنی رہبری شوریٰ تک پہنچانے کے لیے کل (جمعہ) تک کی مہلت چاہتے ہیں۔

ادھر جرگے نے مسلح گروہوں سے دوٹوک موقف اختیار کرتے ہوئے کہا کہ اگر وہ واقعی امن چاہتے ہیں تو انہیں افغانستان واپس چلے جانا چاہیے اور اگر وہ لڑائی پر بضد ہیں تو کم از کم آبادی والے علاقوں کو چھوڑ کر پہاڑی علاقوں کا رخ کریں تاکہ عام شہری متاثر نہ ہوں۔

واضح رہے کہ باجوڑ اور گرد و نواح میں پاکستان کی سیکیورٹی فورسز نے عسکریت پسندوں کے خلاف بھرپور آپریشن "سربکف" شروع کر رکھا ہے۔

اس آپریشن "سربکف" کے دوران کئی شدت پسند مارے گئے ہیں جبکہ درجنوں کو گرفتار بھی کیا گیا ہے۔ سیکیورٹی ذرائع کے مطابق کارروائیاں مخصوص اطلاعات کی بنیاد پر جاری ہیں اور کئی علاقوں میں کرفیو بھی نافذ کیا گیا ہے۔

تاہم مقامی ذرائع اور صحافیوں کا کہنا ہے کہ سیکیورٹی کارروائی کے دوران عام شہری بھی بری طرح متاثر ہو رہے ہیں۔ اب تک 4 شہری ہلاک اور 12 زخمی ہو چکے ہیں۔ 

مقامی لوگوں اور عمائدین کی کوشش ہے کہ بات چیت کے ذریعے امن قائم ہو تاکہ مزید خونریزی سے بچا جا سکے۔