بلوچستان میں سیکیورٹی فورسز کی کارروائی: بی ایل اے کا اہم کمانڈر ساتھیوں سمیت ہلاک، مشکے میں فورسز پر حملہ

کوئٹہ+ ڈیرہ بگٹی+ آواران (ڈیلی اردو رپورٹ) بلوچستان کے ضلع ڈیرہ بگٹی میں سیکیورٹی فورسز نے خفیہ اطلاع پر کارروائی کرتے ہوئے کالعدم تنظیم بلوچ لبریشن آرمی (بی ایل اے) کے انتہائی مطلوب کمانڈر دلیل عرف ماما کو چھ ساتھیوں سمیت ہلاک کر دیا۔ دوسری جانب ضلع آواران کی تحصیل مشکے میں سیکیورٹی فورسز پر دہشتگرد حملے کی اطلاع ہے، جس میں ہلاکتوں کا خدشہ ظاہر کیا جا رہا ہے۔

ڈیرہ بگٹی: بی ایل اے کمانڈر ہلاک

سیکیورٹی ذرائع کے مطابق، یہ کارروائی خفیہ انٹیلیجنس معلومات کی بنیاد پر کی گئی۔ دلیل عرف ماما بی ایل اے کا اہم کمانڈر اور متعدد حملوں میں مطلوب تھا۔ اس پر ریاستی تنصیبات، گیس پائپ لائنوں اور سیکیورٹی فورسز پر حملوں کی منصوبہ بندی اور قیادت کا الزام تھا۔

کارروائی کے دوران چھ دیگر شدت پسند بھی مارے گئے، جن کے قبضے سے بھاری مقدار میں اسلحہ، گولہ بارود اور حساس نوعیت کے دستاویزات برآمد کیے گئے۔ سیکیورٹی فورسز نے علاقے کو گھیرے میں لے کر کلیئرنس آپریشن مکمل کر لیا ہے۔

حکام کا کہنا ہے کہ دلیل عرف ماما کی ہلاکت بی ایل اے کے لیے ایک بڑا دھچکا ہے، کیونکہ وہ نہ صرف مقامی سطح پر تنظیم کی قیادت کر رہا تھا بلکہ ایران سے متصل سرحدی علاقوں میں رابطے بھی قائم کیے ہوئے تھا۔

آواران میں فورسز پر حملہ

ادھر آواران کی تحصیل مشکے میں سیکیورٹی فورسز پر حملے کی اطلاع ہے۔ ابتدائی اطلاعات کے مطابق حملے میں جانی نقصان کا خدشہ ہے، تاہم ہلاکتوں کی مصدقہ تعداد تاحال سامنے نہیں آ سکی۔ سیکیورٹی فورسز نے علاقے کو گھیرے میں لے کر جوابی کارروائی شروع کر دی ہے۔

ذرائع کا کہنا ہے کہ مشکے کا علاقہ ماضی میں بھی دہشتگردوں کی کمین گاہ رہا ہے اور وہاں وقتاً فوقتاً سیکیورٹی فورسز کو نشانہ بنایا جاتا رہا ہے۔