بلوچستان میں عسکریت پسندوں کے حملے اور فورسز کی کارروائیاں

کوئٹہ (ڈیلی اردو رپورٹ) بلوچستان کے مختلف اضلاع میں سیکورٹی فورسز کے آپریشن اور بلوچ عسکریت پسندوں کے حملوں میں کئی افراد ہلاک ہوگئے ہیں۔

گوادر

بلوچستان کے ضلع گوادر کے علاقے پسنی میں اتوار کی شب بم دھماکے کے ایک واقعے میں دو افراد ہلاک اور ایک شخص زخمی ہو گیا ہے۔

ڈیلی اردو کے مطابق پسنی شہر میں مسکان چوک قبرستان کے قریب ایک گاڑی کو بم دھماکے کا نشانہ بنایا گیا۔ حملے میں گاڑی میں سوار دو افراد، سلمان اور محمد نواز، موقع پر ہی ہلاک ہو گئے جبکہ ایک اور شخص زخمی ہوا۔

دھماکے کی نوعیت اور حملہ آوروں کی شناخت کے بارے میں تحقیقات جاری ہیں۔

کیچ

کیچ کے تحصیل زامران کے علاقے جمکی تنک میں عسکریت پسندوں نے پاکستانی سکیورٹی فورسز کے ایک پوسٹ پر حملہ کیا۔ حملے کی شدت اور فورسز کے جانی یا مالی نقصان کے بارے میں مزید معلومات تاحال سامنے نہیں آ سکیں۔

مستونگ

مستونگ میں سکیورٹی فورسز نے بڑی تعداد میں پیش قدمی کرتے ہوئے علاقے میں آپریشن جاری رکھا ہوا ہے۔ یہ کارروائی آج مسلسل دوسرے روز بھی جاری رہی۔

حکام کے مطابق آپریشن کا مقصد علاقے میں موجود عسکریت پسندوں کا صفایا کرنا ہے۔

قلات

قلات کے علاقوں خزینئی اور منگو چر میں بڑی تعداد میں مسلح افراد نے مرکزی شاہراہ پر ناکہ بندی کر دی۔

عینی شاہدین کے مطابق حملہ آوروں نے سیندک منصوبے کی سپلائی کرنے والی گاڑیوں پر راکٹ لانچر اور دیگر بھاری ہتھیاروں سے حملہ کیا۔

مسلح افراد کی جانب سے گاڑیوں اور بسوں کی تلاشی کا عمل بھی جاری ہے۔ ابھی تک کسی قسم کی جانی نقصان کی اطلاع موصول نہیں ہوئی ہے۔

بولان

ضلع بولان کے علاقے ڈھاڈر میں واقع پولیس لائن پر نامعلوم حملہ آوروں نے حملہ کیا ہے۔ حملے کی نوعیت، ہدف اور ممکنہ نقصان کے حوالے سے مزید تفصیلات کا انتظار ہے۔