بلوچستان: کیچ میں شدت پسندوں کی کارروائیاں، مرکزی شاہراہ پر ناکہ بندی اور لیویز پوسٹ پر قبضہ

کوئٹہ (نمائندہ ڈیلی اردو ) صوبہ بلوچستان کے ضلع کیچ کے علاقے ہوشاپ میں شدت پسندوں نے دو مختلف کارروائیوں کے دوران مرکزی شاہراہ پر ناکہ بندی کی اور لیویز کی ایک چوکی پر قبضہ کر لیا۔

ذرائع کے مطابق گزشتہ شب شدت پسندوں نے تربت اور ہوشاپ کے درمیان مرکزی شاہراہ پر ناکہ بندی کرتے ہوئے اسنیپ چیکنگ کی۔ کئی گھنٹوں تک انہوں نے سڑک کا کنٹرول سنبھالے رکھا، جس سے آمد و رفت شدید متاثر رہی۔

دوسری جانب شدت پسندوں کے ایک اور گروہ نے ہوشاپ کے علاقے گونڈ سرین میں واقع لیویز چوکی پر حملہ کر کے وہاں موجود اہلکاروں کو حراست میں لے لیا۔ حملہ آور اہلکاروں کو بعد ازاں رہا کر دیا، تاہم چوکی میں موجود اسلحہ اور دیگر سامان اپنے قبضے میں لے لیا۔

کالعدم بلوچ لبریشن آرمی (بی ایل اے) نے ان دونوں کارروائیوں کی ذمہ داری قبول کر لی ہے۔