بنوں سیکیورٹی الرٹ، نورڑ میں 200 مسلح دہشتگردوں کے داخلے کے بعد آپریشن متوقع

بنوں (ڈیلی اردو) ویب ڈیسک: خیبرپختونخوا کے ضلع بنوں کی تحصیل میریان کے علاقے نورڑ میں اس وقت سیکیورٹی کی صورتحال انتہائی کشیدہ ہوگئی جب اطلاعات کے مطابق تقریباً 200 مسلح دہشتگرد علاقے میں داخل ہو گئے۔ عسکریت پسندوں نے مقامی مساجد اور حجروں کو مورچوں میں تبدیل کر کے پوزیشنیں سنبھال لی ہیں۔

ذرائع کے مطابق صورتحال کے پیش نظر پولیس اور سیکیورٹی فورسز کی بھاری نفری علاقے کی جانب روانہ کر دی گئی ہے اور ممکنہ آپریشن کے لیے مکمل تیاری کرلی گئی ہے۔ علاقے میں خوف و ہراس پھیل چکا ہے جبکہ دکانداروں نے حفاظتی طور پر کاروبار بند کر دیے ہیں۔

ڈسٹرکٹ پولیس آفیسر (ڈی پی او) بنوں سلیم عباس کلاچی نے کہا ہے کہ کسی بھی مسلح گروہ یا تنظیم کو علاقے میں دندناتے پھرنے کی اجازت نہیں دی جا سکتی، اور نورڑ میں موجود دہشتگردوں کے خلاف بھرپور کارروائی عمل میں لائی جائے گی۔ ان کا مزید کہنا تھا کہ ممکنہ آپریشن کے دوران عوام کے جانی و مالی تحفظ کو مدنظر رکھا جائے گا، تاہم شہریوں کو ہدایت کی گئی ہے کہ وہ گھروں تک محدود رہیں اور دکانیں بند رکھیں۔

نورڑ میں جاری ہائی الرٹ اور آپریشن کی تیاریوں کے باعث خطے میں ایک بار پھر بدامنی کے سائے منڈلانے لگے ہیں۔