بنوں میں دہشتگردوں کا حملہ، ایف سی اہلکار ہلاک، رابطہ پل بھی تباہ

بنوں (نمائندہ ڈیلی اردو) پاکستان کے خیبر پختونخوا کے ضلع بنوں میں بدھ کے روز عسکریت پسندوں نے فرنٹیئر کور (ایف سی) کی گاڑی پر حملہ کر دیا، جس کے نتیجے میں دو اہلکار شدید زخمی ہو گئے۔ پولیس کے مطابق، زخمیوں میں سے ایک اہلکار اسپتال میں دوران علاج زخموں کی تاب نہ لاتے ہوئے ہلاک ہو گیا۔

پولیس حکام کا کہنا ہے کہ ایف سی کی گاڑی "سٹی کلہ" سے "بنوں ایف سی لائن، دریوبہ" جا رہی تھی کہ راستے میں نامعلوم عسکریت پسندوں نے گھات لگا کر فائرنگ کر دی۔ حملے کے بعد سیکیورٹی فورسز اور ایف سی نے فوری طور پر علاقے کو گھیرے میں لے کر سرچ آپریشن شروع کر دیا، جو تاحال جاری ہے۔

بارودی دھماکے سے رابطہ پل تباہ

اسی روز بنوں کے علاقے ہوید میں نامعلوم عسکریت پسندوں نے ایک رابطہ پل کو بارودی مواد سے اُڑا دیا۔ پل کی تباہی کے نتیجے میں دو اہم دیہاتوں سمیت گردونواح کے کئی علاقوں کا زمینی رابطہ منقطع ہو گیا، جس کے باعث شہریوں کو آمدورفت میں شدید مشکلات کا سامنا ہے۔

ذرائع کے مطابق، پل کی تباہی کے بعد شہری متبادل اور طویل راستے اختیار کرنے پر مجبور ہو گئے ہیں، جس سے انہیں وقت اور مالی اخراجات میں بھی دشواری ہو رہی ہے۔ سیکیورٹی اداروں نے واقعے کے بعد علاقے میں سرچ آپریشن تیز کر دیا ہے اور شرپسند عناصر کی تلاش جاری ہے۔