خیبر: وادی تیراہ میں پاکستانی طالبان کا اسکول پر حملہ، شدید جھڑپیں، ایک ہلاک، متعدد زخمی

اسلام آباد (بیورو رپورٹ) خیبر پختونخوا کے قبائلی ضلع خیبر کی دور افتادہ وادی تیراہ کے علاقے پیر میلہ میں پاکستانی طالبان نے ایک اسکول کو گھیرے میں لے کر سیکیورٹی فورسز پر حملہ کر دیا۔ مقامی ذرائع کے مطابق سیکیورٹی فورسز نے مذکورہ اسکول کو عارضی کیمپ کے طور پر استعمال کیا ہوا تھا۔

حملے کے دوران علاقے میں شدید فائرنگ اور مارٹر گولوں کے دھماکوں کی اطلاعات موصول ہوئی ہیں۔ مقامی ذرائع کا کہنا ہے کہ ایک مارٹر گولہ گرنے سے خان سید نامی شہری ہلاک ہو گیا، جب کہ پاشم اور خان ولی سمیت کم از کم چار افراد زخمی ہوئے۔

فائرنگ کی زد میں آ کر ایک مقامی خاتون اور ایک بچہ بھی زخمی ہوئے۔ شدید بمباری کے باعث پیر میلہ بازار میں کم از کم چھ دکانیں جل کر خاکستر ہو گئیں۔

آخری اطلاعات کے مطابق فائرنگ کا سلسلہ تاحال جاری ہے اور علاقے میں شدید کشیدگی پائی جاتی ہے۔ سیکیورٹی فورسز کی جانب سے کارروائی کی تفصیلات تاحال موصول نہیں ہوئیں۔

مزید معلومات کا انتظار ہے۔