ٹانک میں اغوا کیے گئے پولیو ورکرز مشران کی کوششوں سے بازیاب

ٹانک(ڈیلی اردو)ضلع ٹانک سے ایک روز قبل اغوا کیے گئے پولیو مہم سے وابستہ دو اہلکار بالآخر بازیاب ہو گئے ہیں۔ مقامی ذرائع کے مطابق پنگ ایریا میں جاری پولیو مہم کے دوران نامعلوم مسلح افراد نے صفت خان ولد بادشاہ خان اور حزب اللہ ولد جلال خان کو زبردستی اپنے ساتھ لے جا کر کسی نامعلوم مقام پر منتقل کر دیا تھا۔

واقعے کے فوراً بعد مقامی مشران اور پولیس حکام نے مشترکہ طور پر مغوی اہلکاروں کی رہائی کے لیے رابطے اور کوششیں تیز کر دیں، جن کے نتیجے میں دونوں ورکرز کو گزشتہ شب بغیر کسی جانی نقصان کے رہا کر دیا گیا۔

واضح رہے کہ دونوں پولیو اہلکاروں کا تعلق ٹانک کے نواحی گاؤں کڑی ودتی سے ہے۔ پولیس حکام واقعے کی مزید تحقیقات جاری رکھے ہوئے ہیں۔