افغانستان: کابل کی وزارت ہاؤسنگ میں خودکش دھماکا، 6 افراد ہلاک، 10 زخمی

کابل (ڈیلی اردو/اے ایف پی) افغانستان کے دارالحکومت کابل میں وزارت ہاؤسنگ میں ہونے والے ایک خودکش حملے میں 6 افراد ہلاک اور 10 زخمی ہوگئے جن میں سے 4 کی حالت تشویشناک بتائی جاتی ہے۔

افغان صحافی بلال سروری کے مطابق خودکش حملے کے نتیجے میں 6 افراد ہلاک ہوگئے جبکہ 10 زخمی ہوئے ہیں۔

فرانسیسی خبر رساں ادارے ‘اے ایف پی’ کے مطابق وزارتِ داخلہ کے ترجمان عبد المتین قانی کا کہنا تھا کہ خودکش حملہ آور وزارت کے دفتر میں داخل ہونے کی کوشش کر رہا تھا جب ایک اہلکار نے اس کو نشانہ بنایا جس سے خودکش حملہ آور تو ہلاک ہو گیا البتہ اس کے جسم پر موجود بارودی مواد سے دھماکہ ہو۔

عبد المتین کا مزید کہنا تھا کہ دھماکے کے سبب وہاں موجود ایک شہری ہلاک اور تین زخمی ہوئے ہیں۔

اے ایف پی’ کے مطابق کابل اسپتال کے ایک ڈاکٹر نے نام ظاہر نہ کرنے کی شرط پر بتایا کہ دھماکے کے بعد ہسپتال میں چھ سے سات زخمیوں کو علاج کے لیے لایا گیا ہے۔

اس خودکش حملے کی فوری طور پر کسی گروہ نے ذمہ داری قبول نہیں کی۔

واضح رہے کہ منگل کو بھی صوبہ قندوز کے مرکزی شہر قندوز میں ایک بینک کے باہر خودکش حملہ ہوا تھا جس میں پانچ افراد ہلاک اور سات زخمی ہوئے تھے۔ قندوز میں لوگوں کی بڑی تعداد تنخواہ لینے کے لیے قطار بنائے بینک کے باہر کھڑی تھی کہ اس دوران دھماکہ ہوا۔

اس دھماکے کی ذمہ داری شدت پسند گروہ داعش نے قبول کی تھی۔