طالبان نے افغانستان میں چھوٹی داڑھی پر امدادی کارکن گرفتار کر لیے

کابل (ڈیلی اردو/نیوز ایجنسیاں) افغانستان میں طالبان حکومت کی اخلاقی پولیس نے ایران-افغانستان سرحد کے قریب تقریباً 20 امدادی کارکنوں کو مبینہ طور پر اس وجہ سے حراست میں لے لیا کہ ان کی داڑھیاں طالبان کے مقرر کردہ معیار کے مطابق لمبی نہیں تھیں۔ یہ دعویٰ امدادی تنظیموں سے وابستہ تین ذرائع نے پیر کے روز کیا۔

کابل میں طالبان حکومت سخت مذہبی قوانین کے تحت ملک چلا رہی ہے اور حکام متعدد مواقع پر کہہ چکے ہیں کہ مردوں کو کم از کم ایک مٹھی کے برابر لمبی داڑھی رکھنا چاہیے۔

ذرائع کے مطابق حراست میں لیے گئے افراد ہفتے کے روز ایران سے متصل اسلام قلعہ نامی سرحدی گزرگاہ کے قریب اقوام متحدہ کے شراکت دار اداروں کے ساتھ کام کر رہے تھے۔ سکیورٹی وجوہات کی بنا پر اپنے نام ظاہر نہ کرنے کی شرط پر دو امدادی کارکنوں نے اس حوالسے سے اندرونی مراسلے اے ایف پی کے ساتھ شیئر کیے۔

بین الاقوامی ادارہ برائے مہاجرت (آئی او ایم) کے ایک داخلی بیان کے مطابق، ’’اسلام قلعہ استقبالیہ مرکز میں اقوام متحدہ کے شراکت دار اداروں کے مقامی مرد ملازمین کو داڑھیاں تراشنے یا منڈوانے کی وجہ سے گرفتار کیا گیا۔‘‘

بیان میں کہا گیا کہ بعض امدادی کارکنوں کو اسی روز رہا کر دیا گیا، جبکہ باقی افراد کو آزادی اگلے روز ملی۔

طالبان حکومت کی وزارت امر بالمعروف و نہی عن المنکر نے اس واقعے پر اے ایف پی کی جانب سے رابطہ کیے جانے پر کوئی تبصرہ نہیں کیا۔

تاہم صوبے ہرات میں اخلاقی پولیس کے سربراہ ضیاالدین طیب نے امدادی کارکنوں کی گرفتاری کی تردید کرتے ہوئے کہا، ’’کسی بھی این جی او کے ملازم کو گرفتار یا قید نہیں کیا گیا۔‘‘

انہوں نے البتہ تصدیق کی کہ مختصر داڑھیاں رکھنے پر مختلف سرکاری محکموں کے پانچ ملازمین کو حراست میں لیا گیا تھا۔