ایران کے پاس 400 کلوگرام افزودہ یورینیم موجود ہے: آئی اے ای اے سربراہ

برسلز (ڈیلی اردو) انٹرنیشنل اٹامک انرجی ایجنسی (IAEA) کے سربراہ رافیل گروسی نے انکشاف کیا ہے کہ ایران کے پاس اس وقت 400 کلوگرام یورینیم کے ذخائر موجود ہیں جن کی افزودگی کی شرح 60 فیصد ہے جو جوہری ہتھیار بنانے کے لیے درکار سطح سے محض کچھ ہی کم ہے۔

رافیل گروسی نے خبردار کیا ہے کہ اگر ایران کو جوہری ہتھیار حاصل کرنے سے روکنے کی سفارتی کوششیں ناکام ہوئیں تو طاقت کے استعمال کا خطرہ پیدا ہو سکتا ہے۔ ان کے مطابق، اگر ایران نے افزودگی کا عمل جاری رکھا تو “اس کے پاس اتنا مواد ہوگا کہ دس جوہری بم تیار کیے جا سکتے ہیں۔”

تاہم گروسی نے واضح کیا کہ فی الحال کوئی شواہد موجود نہیں جو اس بات کی تصدیق کریں کہ ایران جوہری ہتھیار بنانے کا ارادہ رکھتا ہے۔ ان کے بقول، اس خدشے کو دور کرنے کے لیے ضروری ہے کہ آئی اے ای اے کے معائنہ کاروں کو دوبارہ ایران جانے کی اجازت دی جائے۔

رافیل گروسی نے بتایا کہ اسرائیلی حملوں سے قبل آئی اے ای اے کے معائنہ کاروں نے ایران کی جوہری تنصیبات کا دورہ کیا تھا، اور اب ان مقامات کی نگرانی سیٹلائٹ تصاویر کے ذریعے کی جا رہی ہے۔ دیگر ممالک بھی ایران کے جوہری پروگرام پر نظر رکھے ہوئے ہیں۔

یاد رہے کہ جون 2025 میں ایران اور اسرائیل کے درمیان جنگ کے بعد امریکہ نے ایران کی جوہری تنصیبات پر حملہ کرتے ہوئے دعویٰ کیا تھا کہ ایران کی جوہری صلاحیت "مکمل طور پر ختم" کر دی گئی ہے۔

ایرانی حکام نے متعدد بار رافیل گروسی کو تنقید کا نشانہ بناتے ہوئے کہا ہے کہ جنگ سے قبل آئی اے ای اے کی رپورٹ نے ایران پر حملے کا جواز فراہم کیا۔ ایران کا مؤقف ہے کہ وہ جوہری ہتھیار بنانے کا کوئی ارادہ نہیں رکھتا کیونکہ سپریم لیڈر آیت اللہ خامنہ ای کے فتوے کے مطابق جوہری ہتھیاروں کی تیاری مذہبی طور پر حرام ہے۔

دوسری جانب یورپی یونین اور امریکہ کا مطالبہ ہے کہ ایران بین الاقوامی معائنہ کاروں کو دوبارہ اپنی جوہری تنصیبات کے معائنے کی اجازت دے تاکہ پروگرام کے پرامن ہونے کی تصدیق ہو سکے۔

فی الحال آئی اے ای اے کا کوئی معائنہ کار ایران میں موجود نہیں، جبکہ ایران کا کہنا ہے کہ پابندیوں کے اطلاق کے بعد معائنہ کاروں کو تنصیبات کے دورے کی اجازت نہیں دی جا سکتی۔