بلوچستان: خضدار میں دھماکا، 4 افراد ہلاک، 5 زخمی

کوئٹہ (ڈیلی اردو/بی بی سی) صوبہ بلوچستان کے ضلع خضدار میں بم دھماکے میں کم ازکم چار افراد ہلاک اور پانچ زخمی ہوئے ہیں۔

دھماکہ ضلع کی تحصیل نال کے ہیڈ کوارٹر نال ٹائون میں ہوا۔

ڈپٹی کمشنر خضدار یاسر اقبال دشتی نے فون پر برطانوی خبر رساں ادارے بی بی سی کو بتایا کہ دھماکے میں کم ازکم چار افراد ہلاک اور پانچ زخمی ہوگئے۔

زخمیوں میں سے بعض کو طبّی امداد کی فراہمی کے بعد علاج کے لیے خضدار شہر منتقل کیا گیا۔

نال میں پولیس کے ایک سینئر اہلکار نے بتایا کہ دھماکہ خیز مواد ایک موٹر سائیکل میں نصب تھا۔

ان کا کہنا تھا کہ دھماکہ خیز مواد کو اس وقت اڑایا گیا جب علاقے میں حکومت کی حامی ایک قبائلی شخصیت عبدالصمد سمالانی کی گاڑی وہاں سے گزر رہی تھی۔

دھماکے کے بعد گاڑی میں آگ بھڑک اٹھی جس سے گاڑی کو شدید نقصان پہنچا۔

دھماکے میں زخمی ہونے والوں میں عبدالصمد سمالانی بھی شامل ہیں۔

پولیس اہلکار کے مطابق دھماکے میں ہلاک ہونے والوں میں سے تین کی شناخت ہوگئی ہے۔

حکومت بلوچستان کے ترجمان شاہد رند نے دھماکے کی مذمت کرتے ہوئے کہا ہے کہ دہشت گرد عناصر عوام کے حوصلے پست نہیں کر سکتے۔

خیال رہے کہ خضدار بلوچستان کے داراحکومت کوئٹہ سے جنوب مغرب میں اندازاً چار سو کلومیٹر کے فاصلے پر واقع ہے۔ یہاں کی آبادی مختلف بلوچ قبائل پر مشتمل ہے اور اس کا شمارصوبے کے شورش سے متاثرہ علاقوں میں ہوتا ہے۔