ایران نے معاہدہ توڑا تو فوجی کارروائی اور بحری ناکہ بندی دوبارہ ہوگی، امریکی وزیر دفاع

واشنگٹن (ڈیلی اردو/روئٹرز) امریکی وزیر دفاع پیٹ ہیگستھ نے کہا ہے کہ تہران اور واشنگٹن کے مابین ایران جنگ کے خاتمے کے لیے طے پانے والے عبوری امن معاہدے کے تحت ایران نے اگر خود پر عائد ہونے والی ذمے داریاں پوری نہ کیں، تو امریکہ پھر سے ایران کے خلاف فوجی کارروائی اور اس کی بندرگاہوں کی ناکہ بندی شروع کر دے گا۔

امریکی دارالحکومت واشنگٹن سے 18 جون کو موصولہ رپورٹوں کے مطابق پیٹ ہیگستھ نے جمعرات کے روز صحافیوں سے گفتگو کرتے ہوئے کہا کہ اب ایران کو لازمی طور پر اپنے وہ تمام وعدے پورے کرنا ہوں گے اور وہ ذمے داریاں بھی جو جنگ بندی سے متعلق مفاہمتی دستاویز کے مطابق اس پر عائد ہوتی ہیں۔

نیوز ایجنسی روئٹرز نے یہ بات واشنگٹن سے اپنے مراسلوں میں بتائی لیکن وزیر دفاع پیٹ ہیگستھ نے اپنا یہ بیان جمعرات کے دن بیلجیم کے دارالحکومت برسلز میں واقع نیٹو کے ہیڈکوارٹرز میں اس مغربی عسکری اتحاد کے وزرائے دفاع کے ایک اجلاس کے حاشیے پر رپورٹروں سے گفتگو کرتے ہوئے دیا۔

پیٹ ہیگستھ کے الفاظ میں، ’’اگر ایران نے اپنی ذمے داریاں پوری نہ کیں، تو ہم اس کے خلاف ایک فولادی بحری ناکہ بندی دوبارہ نافذ کر دینے سے بھی زیادہ کی اہلیت رکھتے ہیں۔‘‘