خیبر: وادی تیراہ میں سیکورٹی فورسز پر حملہ، 3 اہلکاروں سمیت 8 افراد زخمی

باڑہ (نمائندہ ڈیلی اردو) صوبہ خیبر پختونخوا کے قبائلی ضلع خیبر کےعلاقے وادی تیراہ میں سیکورٹی فورسز کی گاڑی پر پہلے سے نصب شدہ بارودی مواد کے دھماکے میں تین اہلکار زخمی ہوگئے تھے جبکہ فائرنگ کی زد میں آنے والی سواریوں سے بھری فلائنگ کوچ میں پانچ سویلین زخمی ہوگئے۔

تفصیلات کے مطابق گزشتہ روز ‏ضلع خیبر وادی تیراہ کے دواتوئی نامی علاقہ میں سیکیورٹی فورسز کی گاڑی پر دہشت گردوں کا حملے نتیجے میں تین سیکیورٹی اہلکار زخمی ہوگئے۔

سرکاری ذرائع کا کہنا ہے کہ حملہ پہلے نصب شدہ بارودی مواد کے ذریعے کیا گیا۔ دھماکے کے بعد دو طرفہ فائرنگ کے نتیجے میں گاڑی میں بیٹھے پانچ مقامی شہری بھی زخمی ہوگئے جن میں خلیل، فاروق اور اکرام اللہ شامل ہیں جبکہ دو دیگر زخمیوں کے نام معلوم نہیں ہو سکے جنکو طبی امداد کیلئے ہسپتال منتقل کر دیا گیا۔

ہسپتال ذرائع کے مطابق زخمیوں کی حالت خطرے سے باہر بتائی گئی ہے۔ واقعہ میں ایک پرائیویٹ فلائنگ کوچ جو وادی تیراہ سے باڑہ جارہی تھیں، فائرنگ کی زد میں آگئی اور اسے بھی شدید نقصان پہنچا ہے۔

دوسری جانب کالعدم تنظیم تحریک طالبان پاکستان نے حملے کی ذمہ داری قبول کرلی۔

ترجمان محمد خراسان نے دعویٰ کیا ہے کہ مجاہدین نے فوج اور ایف سی پر گھات لگا کر حملہ کیا جس کے نتیجے میں صوبیدار میجر سمیت سات اہلکار ہلاک اور چھ زخمی ہوئے جبکہ ایک عدد ٹرک اور ایک پک اپ گاڑی بھی جل کر خاکستر ہوئیں۔